S'u hapën negociatat, ikën Zaev! Maqedonia qeveri teknike dhe zgjedhje të parakohshme më 12 prill

Një ndër takimet më konstruktive1 Kështu e ka cilësuar kreu i BDI-së, Ali Ahmeti mbledhjen me liderët politik për caktimin e 12 prillit si datë të re të zgjedhjeve.

“Mund të them se ky është takimet më konstruktive që kam pasur deri më tani, të gjitha partitë politike thanë se alternative e jonë e vetme është Beshkimi Evropian. Kemi biseduar se për vendin tonë është me rëndësi që të bëhet ratifikimi i marrëveshjes për anëtarësim në NATO nga të gjitha vendet që akoma nuk e kanë ratifikuar. Gjithashtu pas ratifikimit edhe Parlamenti jonë të ratifikon si dhe të miratohet Ligji për Mbrojtjen, dhe deri sa u shterën gjitha argumentet vendosem bashkaarisht që 12 prilli të mbahen zgjedhjet. Me rëndësi është që zgjedhjet të jenë të pranueshme dhe demokratike, të lira sipas gjitha standardeve. Le të fitojë më i miri”- tha Ahmeti.

Kreu i Partisë Demokratike Shqiptare, Zijadin Sela tha se u zgjodh pikërisht kjo datë sepse deri atëhere Maqedonia e Veriut pret anëtarësimin e vendit në NATO.

“Ne ishim të vetmit që e zbukuruam këtë takim sepse ishim prezent bashkë më një zonjë. Ajo që tanimë është konfirmuar, më 12 prill shkojmë në zgjedhje, ne si parti ishim të gatshëm, por 12 prilli u zgjodh për arsye se deri atëherë presim anëtarësimin e vendit në NATO. Qytetarët më 12 prill kanë shans që ta kthejnë shpresën tek të rinjtë, të cilët kohëve të fundit po braktisin shtetin në pamundësi që të prosperojnë këtu”, tha Sela.

 Pas takimit të liderëve, Zaev u shpreh se kjo datë pavarësisht kundërshtimeve që ka pasur opozita në fillim, u vendos në dakordësi të plotë. Ai zbulon se propozimi i partisë së drejtuar prej tij, LSDM -së ishte muaji dhjetor, por më pas u caktua 12 prilli.

“Propozimi jonë ishte që 22 ose 29 dhjetor të shkojmë në zgjedhje sepse në atë mënyrë në atë periudhë mund ta realizojmë procesin zgjedhor dhe më pas të presim edhe ratifikimin e protokollit nga  Spanjë dhe ne të kemi parlament funksional. Kishte reagime nga opozita se nuk mund të ketë 100 qeveri teknike, andaj pastaj u shqyrtua, marsi, prilli, e kështu me radhë dhe me konsensus u vendos që 12 prilli të jetë data kur do të mbahen zgjedhjet”, deklaroi Zaev.

Qeveri teknike 100 ditëshe si dhe zgjedhjet e parakohshme më 12 prill të 2020! Ky është vendimi i marrë në mbledhjen e të liderëve të partive politike me presidentin e vendit Stevo Pendarovski. 

Janë mbledhur pasditen e sotme liderët e partive politike në Maqedoni pas thirrjes nga presidenti Stevo Pendarovski. Liderët e partive po bisedojnë për zgjedhjet e parakohshme parlamentare, të cilat një ditë më parë i kërkoi Zaev pas dështimit me negociatat. Në takim janë kryeministri dhe lideri i LSDM, Zoran Zaev, lideri i VMRO-DPMNE, Hristijan Mickoski, lideri i BDI, Ali Ahmeti, Ziadin Sela, Bilall Kasami, Afrim Gashi dhe Menduh Thaci.

Gazetari Zekirja Mexhiti në një lidhje telefonike për Report Tv ka zbuluar detaje nga mbledhja e partive të thirrura nga presidenti maqedonas Stevo Pendarovski pas propozimit të kryeministrit Zoran Zaev për të çuar vendin në zgjedhje të parakohshme. Mexhiti tha se opozita në Maqedoni ka kërkuar që për zhvillimin e zgjedhjeve të parakohshme të caktohet një qeveri teknike dhe me shumë gjasa kryeministri Zoran Zaev do të pranojë kushtin e saj.

"Pritet të diskutohen edhe organizimi i zgjedhjeve të parakohshme parlamentare dhe disa kërkesa nga opozita që kanë të bëjnë me marrëveshje për organizimin e e zgjedhjeve nga një qeveri teknike. Sipas rregullave qeveria teknike duhet të krijohet tre muaj para mbajtjes së zgjedhjeve të parakohshme. Sipas të gjitha gjasave edhe kryeministri ka pranuar që zgjedhjet të organizohen nga një qeveri teknike. Sot do të diskutohet data e mbajtjes së zgjedhjeve por me gjasa ajo pritet të caktohet në fund të shkurtit ose në fillim të muajit Mars", u shpreh Mexhiti për Report Tv.