200 mijë lekë për të rezervuar një varr, 8 të arrestuar, 2 nën hetim, 2 në kërkim! Në pranga edhe përgjegjësi i sektorit të varrezave publike në bashkinë Tiranë (EMRAT)

‘Kush i bën varrin tjetrit bie vetë brenda’. Kështu zgjodhi ta komentojë kryetari i Bashkisë së Tiranës operacionin e zhvilluar sot nga prokuroria e Tiranës për zbulimin e një grupi që shiste varre, dhe çoi në arrestimin e 8 personave. Veliaj tha në mbledhjen e sotme të Këshillit Bashkiak të Tiranës se bashkia kishte 3 vite që kërkonte të zbulohej se çfarë ndodhte me varret.

“Falenderoj Prokurorinë dhe Policinë e Tiranës për ndihmën. Te varrezat e Tufinës kemi pasur një shqetësim prej kohësh, ku një komunitet sekserësh, të trashëguar prej vitesh, prenotonin varre. Varrezat janë publike, nuk janë private. Ka një ligj që lejon varreza private dhe kush do që të bëjë varreza private duhet të ndjekë procedurat ligjore, të prenotojë toka, varre familjare dhe gjithçka tjetër, por jo në varrezat publike. Nuk e di nëse ata 6-7 të arrestuarit janë fajtorë, këtë duhet ta thotë policia, por shprehja “kush i bën varrin tjetrit, bie vetë brenda” në këtë rast nuk është vetëm metaforë. Dua t’i kërkoj policisë dhe prokurorisë të vazhdojnë bashkëpunimin me Bashkinë e Tiranës. I falenderoj edhe drejtuesit e Prokurorisë së Tiranës, edhe drejtuesit e Policisë së Tiranës për ndihmën që na dhanë”, tha Veliaj.

Fotoja që shihni është një ndër varret  e rezervuara me çmim nga 30-50 mijë lekë. Vari në realitet ishte bosh, por ndërtohej në mënyrë të tillë si të ishte një varr i vërtetë.

Report Tv ka zbardhur emrat e të arrestuarve për abuzimin me tokën në varrezat e Tufinës, për varre të parablerë.

- Eliodor Ndini, 32 vjeç, me detyrë Drejtor i Agjencisë së Shërbimeve Funerale të Bashkisë Tiranë, për veprat penale “Korrupsioni pasiv i punonjësve që ushtrojnë funksione publike”, “Ushtrimi i ndikimit i paligjshëm ndaj personave që ushtrojnë funksione publike” dhe “Shpërdorimi i detyrës”;

- Xhemal Mena, 61 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Shpërdorimi i detyrës”;

- Latif Shehu, 63 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Shpërdorimi i detyrës";

- Gazment Daja, 49 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Korrupsioni pasiv i personave që ushtrojnë funksione publike";

- Bujar Lica, 66 vjeç, për veprën penale “Ushtrimi i ndikimit të paligjshëm ndaj personave që ushtrojnë funksione publike”;

- Alban Ajazi, 28 vjeç, për veprat penale "Ushtrimi i ndikimit të paligjshëm ndaj personave që ushtrojnë funksione publike dhe “Korrupsioni pasiv i punonjësve që ushtrojnë funksione publike";

- Endrin Milla, 37 vjeç, për "Ushtrimi i ndikimit të paligjshëm ndaj personave që ushtrojnë funksione publike" dhe "Korrupsion aktiv i punonjësve që ushtrojnë funksione publike";

- Fatjon Gjonaj, 24 vjeç, për veprën penale "Ndërtimi i paligjshëm". 

Gjithashtu, u proceduan penalisht në gjendje të lirë shtetasit Roza Ndoj, 44 vjeçe dhe Julian Çuka, 31 vjeç, për veprën penale "Shpërdorimi i detyrës".

Në vijim të veprimeve u shpallën në kërkim shtetasit Shaqir Nika dhe Fabjon Gjonaj.

8 është numri i të ndaluarve në kuadër të një operacioni që po zhvillohet nga prokuroria dhe Krimi Ekonomik në Tiranë. Burime për Report Tv bëjnë me dije se operacioni po zhvillohet për një abuzim në lidhje me tenderat  tek varrezat publike. Në këtë hetim të drejtuar nga prokurori Bledar Valikaj, për të zbuluar skemën e korrupsionit e shpërdormit të detyrës janë përdorur përgjime e vëzhgime ambientale, si dhe kontrolle zyrash e banesash.