Non grata e të shkarkuar/ Çfarë ka ndodhur me gjyqtarët e denoncuar nga Tahiri në 2014 për lirimin nga burgu të kriminelëve! 7 vite më pas ministri Çuçi tjetër ‘listë të zezë’

Saimir Tahiri , Bledar Çuçi dhe Poli i Drejtësisë

TIRANË-Përplasja e ditëve të fundit mes Ministrisë së Brendshme dhe strukturave të drejtësisë, për lirimin nga burgu të të arrestuarave nga policia për armëmbajtje pa leje dhe vepra të tjera penale, nuk është e para. Gjatë viteve 2014-2015, Saimir Tahiri, në atë kohë ministër i Brendshëm, ka denoncuar dhe ka kërkuar masa ndaj dhjetëra gjyqtarëve, të cilët lironin nga burgu persona të rrezikshëm të arrestuar nga policia dhe që akuzoheshin nga prokuroria për vepra të rënda penale. Të liruarit nga burgu, përmes vendimeve të dyshimta, akuzoheshin për vrasje, trafiqe, dhunë, mbajtje të armëve dhe municioneve pa leje, kanosje, plagosje, përdhunime, kultivim droge, prostitucion, pastrim parash, vjedhje, vjedhje me dhunë, falsifikim monedhash, aksident me pasoja të rënda etj. KLD-ja nuk ndëshkoi asnjërin prej tyre.

Po çfarë ka ndodhur sot me gjyqtarët e denoncuar 7 vite më parë nga Tahiri, për të cilët në atë kohë nuk u mor asnjë masa nga ish-Këshilli i Lartë i Drejtësisë? Treshja e Apelit të Tiranës Fatmira Hajdari, Gramoz Levanaj dhe Edmond Gogo, u denoncuan në mars të vitit 2014 për lirimin nga burgu të Gjin Nikës, i arrestuar për disa vepra të rënda penale. Nika u vra një muaj pas lirimit nga burgu. Fatmira Hajdari u shkarkuar nga Komisioni i Vetingut në qershor të vitit të kaluar, pasi nuk justifikonte një pasuri me vlerë rreth 1 milionë USD dhe se kishte fshehur bllokimin e vizës amerikane nga Ambasada Amerikane. Gramoz Levanaj dha dorëheqjen sapo Komisioni i Vetingut e njohu me dosjes e verifikimit, ndërsa Edmond Gogo doli në pension.

Gjyqtari Arben Vrioni, i denoncuar për lirimin nga qelia të të arrestuarve nga policia, u shkarkua nga Komisioni i Vetingut në nëntor të vitit 2019, pasi nuk justifikonte pasurinë. Dy vjet pasi u denoncua nga Tahiri, Arben Vrioni kryesoi treshen e gjyqtarëve, të cilët liruan para afatit nga burgu ish-kreun e bandës së Durrësit, Lulzim Berisha. Ish-gjyqtari i Kavajës Osman Aliu, pjesë e kësaj liste, është përjashtuar me 15 vjet nga drejtësia, pasi dha dorëheqjen për t’i shpëtuar Vetingut. Vendimi është marrë nga Komisioni i Vetingut në 5 mars 2020. Osman Aliu, ishte kallëzuar penalisht për fshehje pasurie, ishte pezulluar nga KLD, por u shpallur i pafajshëm nga gjykatat. Ai u rikthye në detyrë dhe u vetëlarguar brenda ditës nga drejtësia, pasi mori 55 paga.

Ish-gjyqtari i Elbasanit, Sulejman Kurti është shkarkuar nga detyra, ndërsa Ilir Çeliku, më parë gjyqtar i Apelit në Vlorë është përjashtuar për 15 vjet nga drejtësia, pasi dha dorëheqjen për t’u mos u përballur me Vetingun. Ramazan Avdiu, Entela Shedula, Tomorr Kullolli dhe Mariana Shegani, pjesë e listës së gjyqtarëve të denoncuar më parë për lirimin nga qelitë e personave të arrestuar nga policia për vepra të rënda penale, janë shkarkuar gjithashtu nga detyra. Deri më sot, vetëm katër gjyqtarë, pjesë e listës, janë konfirmuar në detyrë, duke kaluar filtrin e Vetingut. Ata janë Ilir Përdeda, Arta Duka,Emona Muçi dhe Dritan Hasani. 16 gjyqtarë të tjerë janë në proces verifikimi nga Komisioni i Vetingut, disa prej tyre që në vitin 2019, ndërsa për 8 magjistratë nuk ka nisur ende procesi i rivlerësimit.

Tre ditë më parë, Ministri i Brendshëm Blendi Çuçi ka përmendur pesë emra gjyqtarësh dhe prokurorësh, si të përfshirë, sipas tij, në lehtësimin e masave për njerëzit e krimit, konkretisht: Edlira Cufi, Elona Alvora, Albert Spiro, Erind Rahovica dhe Piro Sota. Asnjëri nga pesë magjistratët nuk e ka kaluar procesin e Vetingut. Edlira Cufi, Elona Alvora, Albert Spiro dhe Piro Sota janë në proces verifikimi, ndërsa për Erind Rahovica nuk është përzgjedhur ende me anë të shortit për t’iu nënshtruar Vetingut. Piro Sota është denoncua edhe ish-ministri Saimir Tahiri 7 vite më parë.

Në 31 janar të këtij vitit, Sota liroi nga burgu tre të akuzar për vrasjen e 57-vjeçarit Pelivan Sinanrrapaj: Ferdinand Merkaj, Fitim Zekaj e Festim Alimerkaj, me argumentin se nuk paraqesin ‘rrezikshmëri shoqërore’. Në tetor të vitit 2019, Piro Sota, liroi nga burgu anëtarin e Bandës së Durrësit, Sardian Sulejmanin, i dënuar me 25 vite burg për vrasjen e Avni Gashit në tetor 2005 në Tiranë si dhe për dy atentate ndaj kreut të bandës, Lul Berisha, pas përçarjes së bandës. Sota i fali 5 vite burg Sulejmanit, me argumentin se ka babanë vetëm. Gjyqtari Piro Sota ka marrë pjesë edhe në lirimin nga burgu të Fatmir Kajollit, mikut të Fatmir Mediu, i dënuar në Itali dy herë me 40 vite burg si pjesë e një organizate kriminale të narkotikëve.

Gjyqtarët e denoncuar nga Tahiri:

Fatmira Hajdari, i është bllokuar viza amerikane, e shkarkuar nga shkalla e parë për 1 milionë USD pasuri të pajustifikuar.

Gramoz Levanaj, i përjashtuar për 15 vjet nga drejtësia 

Edmond Gogo, doli në pension

Arben Vrioni, i shkarkuar nga Vetingu

Osman Aliu, i përjashtuar për 15 vjet nga drejtësia 

Sulejman Kurti, i shkarkuar nga Komisioni i Vetingut

Ilir Çeliku, i përjashtuar për 15 vjet nga drejtësia 

Ramazan Avdiu, i shkarkuar nga Vetingu

Entela Shedula, e shkarkuar nga Vetingu

Tomorr Kullolli, i shkarkuar nga Vetingu

Mariana Shegani, e shkarkuar nga Vetingu

Halil Vani, doli në pension

Piro Sota, në proces verifikimi 

Engjëllushe Tahiri, në proces verifikimi 

Llesh Jaku, në proces verifikimi 

Seladin Pysqyli, në proces verifikimi 

Engert Pëllumbi, në proces verifikimi 

Mirela Mishgjoni, në proces verifikimi 

Adelina Zarka, në proces verifikimi 

Albert Spiro, në proces verifikimi 

Bujar Musta, në proces verifikimi 

Besnik Shehu, në proces verifikimi 

Maksim Qirjazi, në proces verifikimi 

Andi Pogaçe, në proces verifikimi 

Blerta Çibuku, në proces verifikimi 

Andri Ymeri, në proces verifikimi 

Mirela Iliopulli, në proces verifikimi 

Olkeda Manellari, në proces verifikimi 

Dedë Miri, ende i paverifikuar nga Vetingu

Besnik Qira, ende i paverifikuar nga Vetingu

Alvano Murataj, ende i paverifikuar nga Vetingu

Albina Spaho, ende e paverifikuar nga Vetingu

Eugert Selmani, ende i paverifikuar nga Vetingu

Altin Shkurti, ende i paverifikuar nga Vetingu

Tonin Strekaj, ende i paverifikuar nga Vetingu

Miljana Muçaj, ende e paverifikuar nga Vetingu

Ilir Përdeda, konfirmuar në detyrë

Arta Duka, konfirmuar në detyrë

Emona Muçi, konfirmuar në detyrë

Dritan Hasani, konfirmuar në detyrë

K.T./Shqiptarja.com
  • Sondazhi i ditës:

    A besoni se premtimet e programit të qeverisë Rama 3 do të realizohen?

Komento


×

Lajmi i fundit

John

FOTOLAJM/ Betimi në Presidencë, Rama dhe ministrat drejt Kryeministrisë në këmbë! Pamjet si presin semaforin te Kryesia e Kuvendit