OFL në Përmet e Gjirokastër/ Kush janë katër të dënuarit për drogë që duhet të deklarojnë pasurinë

OFL i ka dërguar formularin për deklarimin e pasurisë katër personave të dënuar në Përmet dhe Gjirokastër.

Mësohet se bëhet fjalë për Niko Qëndrin, Çimi (Ndriçim) Ibrahimin, Avdul Avdulin dhe Ermal Ndreun.

Të katërt ata janë të dënuar për veprën penale të trafikimit të lëndëve narkotike.

Njoftimi i plotë

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

N. Q., banues në Përmet, i dënuar për veprën penale “Trafikimi i narkotikëve”;

Ç. (N.) I., banues në Gjirokastër, i dënuar për veprën penale “Trafikimi i narkotikëve”;

A. A., banues në Gjirokastër, i dënuar për veprat penale “Prodhimi dhe shitja e narkotikëve” dhe “Kultivimi i bimëve narkotike”;

E. N., banues në Gjirokastër, i dënuar për veprën penale “Trafikimi i narkotikëve”.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.

 

B.K./Shqiptarja.com

TAG:
• ofl
• Niko Qëndrin
• Avdul Avduli
• Ermal Ndreu