OSBE vlerëson Zef Mazin si kryenegociator: Do të sjellë njohuri dhe mençuri për Shqipërinë drejt BE

Përfaqësuesi Special i Asamblesë Parlamentare të OSBE-së për Evropën Jug-Lindore, Mark Pritchard, përshëndeti emërimin e Ambasadorit Zef Mazi si Krye negociatorin e Shqipërisë me Bashkimin Evropian.

I emëruar nga Kryeministri i Shqipërisë, Edi Rama, Ambasadori Mazi është një diplomat me një përvojë të gjatë dhe të shquar, i cili gjithashtu ka shërbyer si Përfaqësuesi i Përhershëm i Shqipërisë në OSBE.

“Ambasadori Mazi do të sjellë njohuri dhe mençuri të gjerë dhe unë besoj se përvoja e tij do të kontribuojë në mënyrë të konsiderueshme në diskutimet drejt përparimit të Shqipërisë drejt anëtarësimit në BE,” tha Pritchard.

“Unë e mirëpres këtë hap dhe mbështes kërkimin e unitetit politik në ndjekjen e qëllimeve të politikës së brendshme dhe të jashtme të Shqipërisë.”

Në mars të këtij viti, Këshilli Evropian miratoi hapjen e negociatave të pranimit me Shqipërinë dhe Maqedoninë e Veriut.

TAG:
• edi rama
• Hapja e negociatave
• OSBE
• Zef Mazi