Paradoksi/ Iku nga drejtësia nga frika e Vetingut, Joana Qeleshi gjen ‘strehim’ tek Spitali Amerikan ku në lojë janë sërish paratë publike

Joana Qeleshi dhe Spitali Amerikan

Joana Qeleshi nuk do të japë me vendime në emër të Republikës për të tjetërsuar dhjetëra mijëra katrorë pronë publike, për t’u bërë shkak për dhunim biznesmenësh të huaj dhe për të futur në sherr segmentet kriminale me shtetin e njëri-tjetrin, por tashmë do të kopsitë nga ana juridike lerat e Spitalit Amerikan, me pronar Klodian Allajbeun, i cili ka raportet të vazhdueshme financiare me institucionet publike për shërbime shëndetësore. Ky është një ndër paradokset me gjyqtarët dhe prokurorët, të shkarkuar nga Vetingu apo që ia kanë mbathur nga drejtësia, pikërisht për shkak të frikës nga Vetingu, siç është edhe rasti i ish-kryegjyqtares së Durrësit, Joana Qeleshi, të cilët nuk u ndahen parave publike.

Kjo e fundit, pasi është njohur me rezultatet e Komisionit të Vetingut për pasurinë dhe figurën, ka paraqitur dorëheqjen pranë Këshillit të Lartë të Drejtësisë, për t’iu përkushtuar sektorit privat. “Pavarësisht pasionit tim për profesionin e gjyqtarit, duke qenë se më është ofruar një mundësi profesionale me preferencën dhe ekspertizën time në fushën e Shoqërive Tregtare, kam vendosur të ndjek një stad të ri në karrierën time, duke iu përkushtuar sektorit privat”, ka thënë Qeleshi në kërkesën e dorëheqjes. Dhe mundësia për stadin e ri në karrierë, nga kryegjyqtare e Durrësit, është pozicioni Drejtores Juridike pranë Spitalit Amerikan. Në lojë janë sërish paratë publike. Përpos të tjerave në të kaluarën, Spitali Amerikan ka lidhur një kontratë me Qendrën Spitalore Universitare “Nënë Tereza”për shërbimin e koronarografisë, për shkak se QSUT pretendon se nuk e ofron dot këtë shërbim. Kjo do të thotë se shqiptarët paguajnë taksa që ky shërbim të ofrohet nga sektori publik, por QSUT ia kalon Spitalit Amerikan.

Kjo kontratë ka qenë objekt hetimi nga Prokuroria e Tiranës që në prill të këtij viti. Dyshimet konsistonin se për shërbimin e koronarografisë ka një fryrje të faturave financiare, të cilat nuk korrespondojnë me numrin e pacientëve që marrin shërbimin e koronarografisë në spital. Në vitin 2016, mes pronarit të Spitalit Amerikan Klodjan Allajbeu dhe Ministrisë së Shëndetësisë është firmosur koncesioni PPP për shërbimin e hemodializës, për një vlerë prej 8 miliardë lekë të reja. Në shkurt të këtij viti, Redaksia investigative pranë Report Tv dhe Shqiptarja.com zbuloi edhe lidhjet e fshehta mes PPP të hemodializës dhe laboratorëve. Në këto rrethana, Joana Qeleshi, e cila nuk pati kurajën të përballet me filtrin e Vetingut, do të ketë rol kyç në mbikëqyrjen nga pikëpamja juridike të këtyre kontratave, me kosto për buxhetin e shtetit.

d.ba./Shqiptarja.com
Komento