KQZ rrëzon kandidaturën e Shkarpës në Berat, Patozi: S'është rastësi, PD dhe PS janë bërë bashkë kundër BD

Komisioni Qendror i zgjedhje ka rrëzuar me vota unanime kandidaturën e partisë 'Bindja Demokratike' në qytetin e Beratit.

Anëtarët e këtij Komision e argumentuan votën e tyre duke thënë se Pavllo Shkarpa nuk është banor i zonës ku kandidon, siç parashikohet në ligj, por është regjistruar vetëm pak ditë pasi shpalli kandidaturën. Megjithatë, kryetari i kësaj partie, Astrit Patozi ka deklaruar se ky vendim është një "puç" ndaj BD nga dy partitë e mëdha, PD dhe LSI, shkaktare të krizës politike. Ai shprehet se këto dy forca politike kanë kërcënuar kandidatët e Bindjes që të tërhiqen nga gara, e ndërsa bën fajtore të drejtpërdrejtë PS për në qarkun e Beratit. Për Patozin, rrëzimi i kandidaturës së  Shkarpës dhe Devi Hebibasi, i cili u tërhoq fare papritur nga kandidimi, është një tregues se PS synon që të zgjedhjet e 30 qershorit të mos ketë asnjë konkurrent përballë.

Patozi njofton se do të apelojë vendimin e sotëm të KQZ për Shkarpën, e ndërsa paralajmëron qeverinë dhe PD që të heqë dorë nga këto goditje të ulëta ndaj njerëzve të saj.

Deklarata e plotë

"Përfaqësuesit e qeverisë në KQZ rrëzojnë arbitrarisht kandidatin tonë në Berat Komisioni Qendror i Zgjedhjeve i dominuar nga përfaqësuesit e shumicës rrëzoi sot në mënyrë arbitrare kandidatin e BINDJES DEMOKRATIKE në Berat, zotin Pavllo Shkarpa, duke i hapur rrugën zgjedhjeve me një kandidat të vetëm në atë bashki. KQZ, e cila votoi si rrallë herë me unanimitet ishte sot shumë e vendosur për ta ndëshkuar kandidatin tonë, ndonëse në kundërshtim flagrant me kushtetutën e vendit. Argumenti i përdorur prej anëtarëve socialistë të KQZ, sipas të cilit zoti Shkarpa është regjistruar me vonesë në gjendjen civile të Beratit, nuk gjendet asgjëkundi në Kodin Zgjedhor apo në kushtetutën e vendit.

Vendimi absurd, që ngjante dukshëm si i paracaktuar, e çon në dy numrin e kandidatëve të BINDJES DEMOKRATIKE të përjashtuar nga gara prej qeverisë. Disa ditë më parë kandidati ynë për Skraparin, zoti Devi Hebibasi, u tërhoq fare papritur nga kandidimi, pasi u ndje i kërcënuar nga përfaqësuesit e "Rilindjes" atje. Vlen të theksohet se të dy kandidatët tanë të rrëzuar nga njerëzit e qeverisë i përkasin të njëjtit qark.

Vendimi i sotëm pason dorëheqjen e dy kandidatëve tanë në Lezhë e Kavajë, të cilët e morën vendimin të ndikuar dukshëm nga presioni i Partisë Demokratike. Dhe tashmë mund të flitet për një barazim të plotë mes "Rilindjes" dhe "Republikës së Re" në raport me gjuetinë ndaj kandidatëve tanë. E ndodhur në këto kushte, BINDJA DEMOKRATIKE deklaron se është e vendosur t'i shkojë deri në fund betejës së saj ligjore për të garuar me kandidatin e saj në Berat. Ndërkohë, ajo paralajmëron qeverinë që të heqë dorë nga këto goditje të ulëta ndaj njerëzve të saj, sidomos në qarkun e Beratit.

Nuk mund të jetë kurrësesi rastësi që kandidatët tanë po sulmohen njëkohësisht nga të dy partitë e vjetra, të cilat janë përgjegjëse për krizën e sotme që kalon Shqipëria. BINDJA DEMOKRATIKE fton partnerët tanë, të cilët janë të interesuar për zgjedhje të lira dhe të ndershme në Shqipëri, që të ushtrojnë të gjithë ndikimin e tyre që procesi të mos cenohet më tej, nga brutaliteti i qeverisë dhe i atyre që kërcënojnë të prishin zgjedhjet".

B.K./Shqiptarja.com

TAG:
• kqz
• kqz
• astrit patozi
• Bindja Demokratike