Ndihmat shpërndahet çdo ditë, PD mbyll sytë! Bardhi: Rama mban qytetarët me gënjeshtra

Partia Demokratike ka akuzuar kryeministrin Edi Rama se po mashtron shqiptarët në lidhje me pagën mujore por dhe me ndihmat ushqimore e medikamentet, duke lënë jashtë skeme me qindra familje e pensionistë në nevojë. Për Partinë Demokratike, Rama po gënjen qytetarët pasi u premtoi se fundi i muajit nuk do i gjente pa para, ndërkohë që vetë kryeministri ka premtuar se shpërndarja e pagave të luftës do të nis në fillim të muajit prill.

"Më 17 mars Edi Rama u premtoi shqiptarëve se "nuk do të vijë fundi i muajit pa pagën e gjithkujt ndër ju që qëndron në shtëpi si pasojë e mbylljes së biznesit ku punon!” E vërteta është se Edi Rama i ka gënjyer dhe braktisur qytetarët. Ai kapet çdo ditë në flagrancë duke gënjyer shqiptarët. Premtoi se gjithkush do të kenë pagesën në fund të muajit mars për bizneset e mbyllura, por marsi kaloi dhe ai nuk dha asnjë qindarkë", shkruan Gazment Bardhi.

Në fillim të prillit janë hapur aplikimet për të vetpunësuarit e biznesit të vogël, që për shkak të koronavirusit janë të detyruar të rrinë në shtëpi dhe në bazë të këtyre regjistrimeve do të nis dhe dhënia e pagës së luftës që ka premtuar qeveria për të të gjithë personat që kanë mbetur pa punë pikërisht për shkaka të COVID-19. Një tjetër mashtrim i qeverisë, sipas PD, është edhe me ndihmat ushqimore ku ka lënë jashtë shumë familje në nevojë dhe pensionistë.

"Premtoi se askush nuk do të mbetet pa ndihmë financiare, por la jashtë paketës së ndihmës mijëra biznese dhe qindra mijë kryefamiljarë dhe qytetarë në nevojë.  Premtoi ndihmë me ushqime e ilaçe për të gjitha familjet në nevojë dhe pensionistët, por ka braktisur mijëra familje e pensionistë, që janë në kufijtë e mbijetesës. Ekonomia e familjeve të papuna dhe ekonomia e vendit nuk mbahet në këmbë me mashtrime dhe propagandë. Shqiptarët meritojnë një paketë reale të ndihmës financiare, që nuk përjashton askënd", shkruan Bardhi.

Sa për ndihma humanitare dhe pakot me ushqime, vetë qeveria por dhe ministria e mbrojtjes publikojnë çdo ditë të dhëna të shoqëruara me video për ndihmën me medikamente, ushqime dhe shërbime të tjera për pensionistët dhe familjet në nevojë. Kërkesat e Partisë Demokratike për t'i ndihmuar të gjithë pasi janë në vështirësi janë të drejta dhe të gjithë jemi dakord që duhen ndihmuar, por duket se PD ka harruar se Shqipëria është një vend i vogël, me ekonomi të brishtë dhe në pamundësi për të ndihmuar këdo. Për këtë vetë kryeministri Rama është shprehur se në fillim do të ndihmohen persona më në hall dhe të prekur nga kjo situatë lufte.

TAG:
• gazmend bardhi
• Koronavirus
• koronavirusi ne shqiperi