PD: Qeveria të lejojë ekspertët të kryejnë testim të zgjeruar! Rama: Ia fusni kot dhe pikë

TIRANË- Partia Demokratike këmbëngul se qeveria duhet të lejojë ekspertët të kryejnë testim të zgjeruar, por në përgjigje të kësaj deklarate kryeministri Edi Rama ka sqaruar se nuk është në dorën e tyre! Rama thotë se është Komiteti Teknik i Ekspertëve që përcakton strategjinë e testimit dhe jo qeveria duke shtuar se " PD i'a fut kot".

"A mundet dikush t'ia thotë PD se qeveria nuk vendos sa teste bëhen a nuk bëhen?! Aq më pak qeveria mund të marrë mendjen e PD-së për këtë punë! Strategjinë e testeve e bën Komiteti Teknik i Ekspertëve dhe PIKË! Qeveria zbaton ato që vendos Komiteti dhe Pikë! PD i'a fut kot.Pikë", shkruan Rama.

Postimi i plotë i kryeministrit Edi Rama

Ishte Mirela Tabaku nga selia blu e cila ditën e sotme e cila këmbënguli se në rast se nuk do të bëhen testime në masë, do të hidhet poshtë e gjithë sakrifica e qytetarëve që kanë respektuar masat. Sipas tyre, masat e distancimit social janë të domosdoshme për të ngadalësuar përhapjen, por vlera e mbylljes në shtëpi bie, nëse nuk e dimë se kush është i infektuar

"Ne stadin epidemiologjik ku është Shqipëria, për të mos çuar dëm sakrificën e qytetarëve, por edhe stafit shëndetësor, merr peshë të madhe testimi më i zgjeruar. Kjo masë është e domosdoshme për të ditur situatën reale ku ndodhet vendi, për të realizuar me efikasitet procesin e gjurmimit e me pas izolim dhe trajtim, por edhe si do të veprojmë për të parashikuar dhe llogaritur masat shëndetësore, ekonomike, sociale etj. që nevojiten për të përballuar këtë situatë. Është momenti që Qeveria të vlerësojë me seriozitet dhe përgjegjshmëri që sa më shumë të zgjasë periudha e testimeve të ulëta, aq më të mëdha do të jenë pasojat në shëndetin e qytetarëve, pasojat ekonomike dhe sociale, që gjithashtu sjellin pasoja ne shëndetin mendor dhe fizik te popullatës.

Masat e distancimit social janë të domosdoshme për të ngadalësuar përhapjen, por vlera e mbylljes në shtëpi bie, nëse nuk e dimë se kush është i infektuar. Gjurmimi i të gjitha kontakteve të personave të konfirmuar me COVID-19 dhe testimi i tyre, testimi i stafeve shëndetësore dhe punonjësve të tjerë që janë në kontakt të përditshëm me qytetarët duhet të jetë prioritet. Pushteti lokal, institucionet e shëndetit publik në zonë, mjekët e familjes duhet të përfshihen në këtë gjurmim, pasi janë shumë më afër qytetarëve dhe njohjet janë më të mëdha. Ndaj ripërsërisim kërkesën ndaj Qeverisë që t’u mundësojë ekspertëve numrin e mjaftueshëm të testimeve, që ata të jenë në gjendje të bëjnë detyrën e tyre.

Qeveria duhet të ketë një strategji të qartë dhe transparente, jo vetëm për rritjen e numrit të testimeve, por edhe për llojet e testeve dhe zgjerimin e kategorisë së personave që e kryejnë testin, bazuar plotësisht në udhëzuesit e Organizatës Botërore të Shëndetësisë dhe Qendrës Europiane për Kontrollin dhe Parandalimin e Sëmundjeve", thuhet ndër të tjera në reagimin e PD-së.

Kundër testimit në masë ka qenë edhe presidenti Ilir Meta, i cili tha se se zgjidhja për të frenuar përhapjen COVID-19 është gjurmueshmëria e rasteve të dyshuara, dhe më tej testimi i kontakteve të dyshuara që vjen si pasojë e hetimit epidemiologjik.

B.K./r.k./Shqiptarja.com

TAG:
• edi rama
• lulzim basha
• PD
• Koronavirus
• koronavirusi ne shqiperi