Pensionistët nuk mbyllen në shtëpi: Do dalim të marrim për të ngrënë, nuk na i sjell njeri qoftet te dera! Shumica e qytetarëve jashtë, pa autorizim (Video)

Në Elbasan lëvizjet në rrugë sot kanë qenë të reduktuara, si pasojë e rregullave të reja të cilat lejojnë vetëm një person të lëvizë nga shtëpia. Edhe ai vetëm në rastin kur ka siguruar leje. Në një vëzhgim të bërë shumica e qytetarëve në rrugë shprehen se e kanë bërë diçka të tillë, por ka edhe nga ata që kanë në rrugë pa leje.

Qytetari 1: "Po kam marrë autorizimin me celular dhe kam dalë të bëj pazar."

Qytetari 2: "Unë kam dalë që të blej ushqime për prindërit, kam marrë leje."

Në Lezhë  urdhri i qeverisë për të qëndruar në shtëpi, nuk i ka penguar pensionistet të dalin për të kryer nevojat e tyre shtëpiake. Gjatë kësaj të hënë në rrugët e qytetit kishte prezence të personave të moshuar, por edhe qytetareve të cilët lëviznin pa autorizim nga policia. Lezhjanet thonë se e kanë të domosdoshme të dalin për të blerë ushqime, ndërsa shprehen se e kanë të paqartë aplikimin për leje.

Qytetari 1: "Jam pensionist. Mora ilaçet dhe po iki. Unë nuk frikë, koronavisuri smë bën gjë. As policia s'më ka thënë gjë, e dinë ata që s'dal kot. Leje skam marrë. Unë jam i detyruar të dalë se skam asnjë tjetër që më ndihmon në shtëpi."

Qytetari 2: "Leje nuk kam marrë, por dolën të gjithë dhe dolëm edhe ne. Unë jam me kemp e kam shkuar me marrë ilaçet."

Qytetari 3: "Nuk ka marrë leje se këto më shumë janë përralla politike. S'kam për çfarë të aplikoj?! Të aplikoj për të dalë më bërë pazar? Për më ngrënë bukë? Nuk kam pa asnjë polic. Për çfarë të më gjobisin? A kam vrarë ndokënd?! Kjo është një super rrenë."

Qytetari 4: "Jam duke ik me marrë disa lekë. Më pas me to do të blej bukën. Leje nuk kam marrë, shikoje përzotin çfarë telefoni kam."

Hyrje në fuqi e rregullave të reja është shoqëruar me prezence të shtuar të policisë dhe ushtrisë në qytetin e Lezhës, të cilët fillimisht janë munduar që ti këshillojnë qytetaret e pabindur, duke mos marrë masa ndëshkimore ndaj tyre.

Edhe në Tiranë, të moshuarit, pensionistët e vetmuar kanë dalë vetë për t'i bërë pazaret edhe pse qeveria ka nxjerrë që rregull të ri që nga sot ia ndalon daljen nga shtëpia. Një e moshuar për mikrofonin e Report Tv thotë: Unë jam vetëm nuk kam njeri në shtëpi, s'kam njeri të më lajmërojë.

Kjo është një problematikë që po haset në të gjithë vendin pasi duke marrë numrin e lartë të pensionistëve, edhe atyre të vetmuar që janë mbi 80 mijë, është e vështirë të gjenden kapacitetet njerëzore për t'i shërbyer.

Sot qytetarët e Korçës janë përballur me masat e reja kufizuese, por jo të gjithë i kanë respektuar. Qytetaret kanë dalë për plotësim e nevojave bazë edhe pse një pjesë nuk kanë mundur të sigurojnë lejen e daljes sepse sistemi nuk ka funksionuar.

Ndërkohë pensionistët vijojnë të mbeten më problematikët në Korçë, të cilët edhe pse janë në dijeni se e kanë kategorikisht të ndaluar për të dalë nga shtëpia, sërish dalin për të blerë barna apo ushqime.

Një qytetar thotë: "Po na sorollatin, nuk dimë ku të drejtohemi. Po shkel rregullin nga e keqja,kam nevojë që të ha."

Një tjetër qytetar: "Dal nga nevoja, ku di unë të përdor telefonin nuk kam as lekë në telefon. Bashkia s'na ka ndihmuar me asgjë. Unë fëmijët i kam jashtë shtetit, jam me burrin të dy të sëmurë, por do paguaj ujin, dritat, do ha bukë."

LEZHË - Edhe në qytetin e Lezhës, pensionistët kanë dalë nga shtëpia, duke mos respektuar rregullin e ri që hyn në fuqi nga sot, ku i ndalon ata që për çfarëdo arsye të lënë banesën. Kryetari i bashkisë së Lezhës, Pjerin Ndreu tha se ditën e sotme një pensionist i shkoi deri në bashki. Në një lidhje me Skype për Report Tv, kryebashkiku i bëri apel pensionistëve të qëndrojnë në shtëpi. Ai tha se do t'u ofrohet shërbimi në banesë me ndihma nga bashkia. Por Ndreu shtoi se edhe bizneset private janë ofruar në ndihmë të kësaj situate të vështirëve, duke i çuar ushqime me delivery në banesë. Kryetari i Bashkisë tha se për të përballuar situatën dhe për t'i shërbyer të gjithë pensionistëve të vetmuar, është kërkuar edhe solidariteti i qytetarëve, të cilët janë shprehur të gatshëm për t'i ndihmuar të moshuarit duke ia bërë ata pazaret.

Po ashtu - tha Ndreu - po u shërbehet edhe familjeve në nevojë, edhe me ndihmën e privatëve. Janë rreth 800 pako me ndihma që janë dhënë nga bizneset në Lezhë për familjet në nevojë.

"Është një problem realisht serioz ky sepse pensionistët kanë tendencën për të mos u bindur. Gjej rastin t'i bëj thirrje të mbrojnë jetën e vet se është e rëndësishme për ne që ata të jetojnë dhe të jenë të shëndosh. Ka pasur pensionistë që më kanë ardhur tek bashkia. Ne kemi mobilizuar gjithë strukturat tona, por janë regjistruar edhe shumë vullnetarë. Qytetarë që janë të gatshëm të shërbejnë tek pensionistët për blerjet. Jemi në disktuam me një supermarket në Lezhë që do të sigurojë delivery për pensionistët. Ne po trajtojmë me pako shtresat më në nevojë që e kanë burimin e të ardhurave afër zeros, për shkak edhe të situatës ku ndodhemi. Unë gjej rastin të falenderoj biznese të ndryshme në Lezhë që kanë dhënë ndihma, që po shkojnë rreth 800 pako, dhe paguhen në interes të shtresave në nevojë.  2100 familje kemi asistuar deri më sot, dhe pakot janë 3 mijë lekë të reja", tha Ndreu.

Në Shkodër ndryshe nga ditët e tjera sot ka një numër më të ulët të lëvizjes së qytetarëve, nisur edhe nga kufizimet e reja të lëvizjes. Pavarësisht kësaj një numër i konsiderueshëm i policëve dhe ushtarëve janë në terren për të monituara situatën në lidhje me emergjencën e koronavirusit.

Si rrjedhojë autoritet kanë ndalur shumë qytetarë për t'u bërë kontrollet, nëse e kishin lejen për të dalë apo jo. Nga ajo që raportohet është se qytetarët të cilët kanë dalë kryesisht për të blerë ushqime e kanë të disponueshme 'lejen për daljen'.

Postoblloqet e policisë dhe ushtrisë janë të ngritura në shumë pika të qytetit të Shkodrës.

Edhe në Gjirokastër nuk është respektuar rregulli që pensionistët të mos dalin nga shtëpia. Shumë prej tyre thonë se do duhet të dalin për të marrë ushqime pasi nuk ua sjell njeri në shtëpi. 

Ndërkohë ka edhe nga ata qytetarë që sot nuk kanë mundur të marrin dot autorizimin duke aplikuar online tek e-Albania, ashtu sikundër edhe të tjerë që kanë mundur të marrin aprovimin e lejes për të dalë nga shtëpia. 

Një pensionist që kishte dalë jashtë shprehet: Do marrim ndonjë gjë për të ngrënë. Unë nuk kam pasur që në moshën 5 vjeç, nuk më zë gripi mua.  Kemi nevojë të dalim se do të hamë, nuk na sjell qofte njeri.

Ndërkohë një grua e cila nuk është pensioniste, thotë se ka aplikuar për leje për t'u kujdesur për bagëtitë, por nuk ia kanë aprovuar.

 "Kam aplikuar dhe nuk më kanë dhënë, kemi disa bagëti, i thash të paktën në mëngjes, të ndihmoj burrin dhe nuk më lanë. Unë jam e detyruar të dal, si të bëj, ta lë prodhimin të iki dëm, t'i lë pa mjelë bagëtitë. Nuk jam në moshën e pensionit, atë punë që e kemi ngritur vetë ta lëmë, nuk i biem në qafë njeriu nuk kërkojmë punë", shprehet zonja.

Pranverë në qytetin e Kukësit. Parku kryesor i qytetit në këtë fund marsi është pushtuar nga lulet e verdha, prej vitesh në mungesë të një gjelbërimi të tillë me lule të shumta.

Rrugët e qytetit të Kukësit në ditën e 18 të karantinës ngjasojnë me një ditë të zakonshme. Automjete dhe qytetarë të shumtë lëvizin nëpër qytet për të kryer pazarin ditor por shumica nuk kanë aplikuar për leje tek e-Albania.

Edhe pse nga sot të moshuarve nuk u lejohet të dalin nga shtëpia, shumë pensionistë kanë dalë për të marrë ajër të pastër.

Vihet re respektimi i radhës dhe distancës në radhë për pagesat e ujit, energjisë elektrike, shërbimet postare e telefonike ndonëse shumica janë pa masa mbrojtëse. Ora 13:00 shënon edhe fundin e shërbimeve ditore dhe ndalim qarkullimin që në mënyrë rigoroze zbatohet nga qytetarët.

Në qytetin e Fierit sot vërehej më pak lëvizje se ditët e tjera të javës së kaluar, ç'ka nënkupton se qytetarët po i zbatojnë masat e mara nga autoritetet. Gjithsesi nuk mungojnë as qytetarët të cilët kanë dalë në rrugë pa marrë leje, që sipas tyre ka ndodhur për shkak se nuk kanë mundur të aplikojnë në portalin 'e-albania', si pasojë e problemit që ka pasur.

Një pensionist pavarësisht urdhrit të autoriteteve për të mos dalë në asnjë mënyrë, ka bërë të kundërtën pasi sipas tij nuk mund të rrinte pa ushqime.

Qytetari 1, pensionist: "Djali ka gjithë ditën dje që aplikonte për leje dhe nuk e ka marrë. Unë duhet të blej ushqime por nuk më jepet leja. Jemi 4 veta. Ka aplikuar dhe nuk e kap dot. Kërkoj zgjidhje."

Qytetari 2: "Unë do shkoj në punë, policia me ndalon çfarë të bëj unë. Një copë letër kam që punoj në një magazinë."

Një qytetar në Berat ka zgjedhur që të dalë nga shtëpia, pa autorizim. Kjo jo sepse nuk ka zbatuar rregullin e vendosur së fundmi, por sepse thotë që pavarësisht se ka dërguar mesazh në polici, nuk ka marrë një përgjigje.

"Kam bërë tre herë aplikimin dhe nuk më hapet kjo faqja e policisë, nuk ma pranon mesazhin që të ma caktojë orarin që kur të dalë. Kam bërë tre mesazhe, tani nëse kjo është sa për të kaluar radhën ta sqarojë policia", shprehet qytetari.

Ndërkohë, një çift të moshuarish në qytet, duket se nuk janë informuar që nuk duhet të dalin nga shtëpia. Pavarësisht urdhrit, ato kanë dalë, e ndërsa pyetur nga policia, thanë se po ikin te doktori për t'u vizituar. Megjithatë, uniformat blu i kanë këshilluar që të kthehen në shtëpi, të marrin mjekun e familjes në celular.

Në Lushnje qytetarët duket se janë ndërgjegjësuar. Mëngjesin e kësaj të hëne në qytet ka më pak lëvizje, krahasuar me disa ditë më parë. Qytetarët kanë shfrytëzuar këtë fashë orari për të bërë pazar apo për të mbaruar punë në bankë, sportelet e dritave dhe ujit. Edhe në treg, i vendosur në një ambient të hapur, ka bërë që tregtarët, por edhe blerësit të mos jenë shumë pranë me njëri-tjetrin.