'Portali Mësues për Shqipërinë nuk mund të hapet', ministrja Shahini: Mësuesit në praktikë të mos shqetësohen

Ministria e Arsimit Besa Shahini nëpërmjet një videomesazhi ka dashur të sqarojë opinionin mbi dy çështje që kanë rrethuar këto kohë ministrinë që ajo mbulon. Shahini ka deklaruar se për shkak të situatës së krijuar nga koronavirusi portali "Mësues për Shqipërinë" nuk është hapur, pasi mësuesit duhet të testohen në një ambient dhome ku për momentin është e ndalur. Sakaq ajo ka sqaruar edhe mësuesit që këtë vit kanë qenë në praktikë. Sipas Shahinit ata nuk duhet të shqetësohen pasi viti do të quhet.

Njoftimi ministres

Në video-mesazhin e radhës në rrjete sociale, Ministrja Besa Shahini duke falënderuar fillimisht mësuesit për përkushtimin e deritanishëm të treguar ndaj nxënësve dhe procesit mësimor online, informoi të gjithë të interesuarit mbi procesin e portalit “Mësues për Shqipërinë” dhe  kualifikimin e mësuesve, si dhe praktikën e zhvilluar nëpër shkolla.

Në lidhje me hapjen e mundshme të portalit “Mësues për Shqipërinë” për mësuesit potencialë dhe se çfarë do të bëhet me procesin e kualifikimit të mësuesve, Ministrja Shahini ka sqaruar:

“Duke marrë parasysh që këto dy procese kërkojnë testim të mësuesve, pra duhet që një numër mësuesish të qëndrojnë në një dhomë ku realizohet testimi, kjo nuk është e mundur të zbatohet tani që jemi në një gjendje të karantinimit e distancimit social. Por, në momentin e parë që do të normalizohet situata, ne do të ndajmë datat se kur do të zhvillohen testimet si për portalin “Mësues për Shqipërinë”, ashtu edhe për kualifikimin e mësuesve duke ju njoftuar në vijim”.

Znj. Shahini ka adresuar gjithashtu edhe një pyetje të ardhur nga mësuesit praktikantë, të cilët janë interesuar të dinë nëse ky vit i praktikës do të konsiderohet praktikë për ta apo do të duhet ta përsërisin vitin:

“Mos u shqetësoni!”, nënvizon ajo. “Nuk keni nevojë ta përsërisni praktikën e punës. Ju keni bërë mjaftueshëm orë pune në shkollë, të cilat do të konsiderohen drejt praktikës suaj. Një pjesë e madhe e juaja jeni të angazhuar në mësim online me mësuesit tuaj mentorë. Edhe kjo do të konsiderohet si punë praktike, si dhe punën që do ta mbyllni kur të kthehemi nëpër shkolla. Dhe kjo do ta plotësojë për aq sa është e mundur numrin maksimal të orëve që kërkohet nga ju për të konsideruar se e keni mbyllur praktikën nëpër shkolla. Kështu që, pa shqetësime, e kemi marrë parasysh situatën në të cilën gjendemi të gjithë dhe do të jemi maksimalisht fleksibël me juve”, përfundon mesazhin e saj Ministrja Shahini.

Ne.k./Shqiptarja.com

TAG:
• Besa Shahini
• mesues per shqiperine
• koronavirusi ne shqiperi