Prokuroria 'merr kohë' për 31 të arrestuarit e dosjes 'tërmeti'

TIRANË - Dy ditë pas dhjetëra arrestimeve për abuzimet me ndërtimet që u nxorën në pah pas tërmetit të 26 nëntorit, Prokuroria e Tiranës ende nuk ka dorëzuar në gjykatë masat e sigurimit personal që do të kërkojë ndaj 31 të arrestuarve. Një ditë më parë, prokuroria, teksa sqaroi me detaje shkeljet e konstatuara në radhët e zyrtarëve të pushtetit vendor dhe të ndërtuesve, tha se të enjten të akuzuarit do të dilnin para gjykatës për masën e sigurisë, por burime për Report Tv nga Gjykata sqaruan se masat ende nuk kanë ardhur si kërkesë e prokurorisë. Disa nga të arrestuarit kërkojnë lirimin e menjëhershëm, pasi siç janë shprehur avokatët e tyre, nuk ka prova që ata janë shkaktarë të dëmtimeve nga tërmeti që i kthyen objektet në të pabanueshme. Masat e sigurisë pritet të zhvillohen në seancë ditën e premte.

Mes të ndaluarve janë edhe ish-kryekomunari i Farkës, Fatbardh Plaku dhe ai i Kasharit, Besnik Fuçia, si dhe shefi i Urbanistikës në Vorë, Luan Beta, dhe Adhurim Qehahaj, ish-shef i Urbanistikës në Bashkinë e Durrësit.  Ata dyshohen të kenë favorizuar ndërtime jashtë kritereve apo lejeve të lëshuara, për ndërtime të një cilësie të dobët, duke ndërhyrë në strukturë me hollimin e  bazamenteve mbajtëse të tyre. 

Pas Vorës, Kasharit dhe Farkës, hetimet do të vijojnë për bashkinë e Kamzës dhe të ish-komunës së Dajtit, ku prokuroria do të marrë në dorë të gjitha dosjet e objekteve të shpallura të pabanueshme në këto zona.

G.M./Shqiptarja.com

TAG:
• prokuroria e tiranes
• dosja termeti