Elbasan/ Pronarja i rrëmben pistoletën grabitësit në argjendari teksa 'iu fut punës me kokë' mbi florinj (Pamjet spektakolare)

ELBASAN - Pamjet spektakolare janë ato të një grabitje brenda një argjendarie në Elbasan, ku pronarja ka shfrytëzuar një moment 'amator' të autorit, duke i rrëmbyer armën dhe duke vrapuar jashtë argjendarisë.

Autori është Astrit Thaçi, 27-vjeçar nga Durrësi, tashmë i vënë në pranga nga policia, nëse pronarja e argjendarisë me veprimin e guximshëm, është A.Balla.

Nga pamjet e kamerave të sigurisë së argjendarisë, të cilat Report Tv i siguron, shihet teksa grabitësi hyn në argjendari. Fillimisht ai bën si blerës normal, ku shfaq interes për disa bizhuteri, e madje provon në gisht edhe disa lloje të ndryshme unazash. Por menjëherë pas këtij 'inskenimi' autori hipën mbi xham duke kaluar në anën tjetër të banakut duke kërcënuar me armë pronaren e argjendarisë. Pasi 'sigurohet' që e ka neutralizuar atë, grabitësi, Astrit Thaçi nis të mbushë në xhepat e xhupit që mban veshur disa florinj. Por teksa ' i ishte futur me kokë' grabitjes së florinjve, i riu në një veprim krejt amator, e lë armën mbi banak. Këtë moment e ka shfrytëzuar menjëherë pronarja e argjendarisë e cila ka nxituar të kapë armën dhe ka mundur të hapë derën dhe të dalë jashtë argjendarisë. Pas saj, ku ka kuptuar se çfarë kishte ndodhur, vrapon edhe autori.

Pas daljes nga dyqani me pistoletën e Thaçit në dorë, pronarja ka bërtitur duke kërkuar ndihmë duke u futur tek lokali ngjitur argjendarisë. I pari që ka mbërritur për të ndihmuar ka qenë oficeri i policisë që gjendej tek dera e Drejtorisë së Policisë së Elbasanit. Kjo, pasi argjendaria ndodhet vetëm 15 metra larg Drejtorisë së Policisë së Elbasanit.

Astrit Thaçi u arrestua të shtunën në mbrëmje në zonën e Kombinatit në Tiranë, ndërsa atij iu zbuluan edhe një sërë vjedhjes të tjera.

27-vjeçari është autor i 8 grabitjeve brenda një jave në Tiranë, Elbasan dhe Durrës.

Një ditë më parë, Report Tv siguroi ekskluzivisht videon e një tjetër grabitjeje me autor 27-vjeçarin, atë të një supermarketi në zonën e Shkozetit. më 11 shkurt. Thaçi vepronte pa doreza, ndërsa në çdo 'aksion' vepronte nën efektin e drogës...gjithmonë i vetëm pa ndihmën e një shoku, nuk përdorte kurrë celular, prandaj ishte e pamundur që ta përgjoje, lëvizte me makina me qira ose taksi dhe në fund fshihej tek e dashura e tij, Adela Berisha. Falë përgjimeve që iu bënë të dashurës, arriti të vihej në prangat e uniformave blu, 27-vjeçari grabitës.

G.M./r.k./Shqiptarja.com

TAG:
• grabitje
• Elbasan
• grabitet argjendaria
• Argjendaria
• astrit thaci