Shehi për 'Report Tv': Koalicioni po ecën mirë! Rama-Meta zigzage, por s'shoh 'prill të dytë'

Kreu i LZHK-së, Dashamir Shehiu tha se propozimet e Ilir Beqaj për ulje të rrogave dhe pensioneve suplementare në fakt nuk janë fare propozime te tij por një tallje që kryeministri Rama bën me shqiptarët që në fund të dalë heroi që shpëtoi popullin nga ulja e rrogave dhe pensioneve.

Shehi hodhi akuza ndaj Beqaj se deri dje shkatërroi shëndetësinë me koncesione e sot kërkon qindarka nga rrogat dhe pensionet.

"Ky është një teatër e Edi Ramës nuk është sa e Beqajt. Ai është një vegël qorre. Ky njeriu që ka dhënë koncesionet e shëndetësisë dhe shkatërroi atë,  sot del dhe na përkon qindarka nga pensionet suplementare. Kjo është një lojë e Edi Ramës që të dalë në gazeta e të tallet se ai shpëtoi popullin nga ulja e rrogave dhe pensionet. Fatkeqësisht kemi arritur në këtë nivel qeverisje. Si rrogat dhe pensionet janë qesharake çfarë do i ulin me. Mjafton të heqin një koncesion dhe s'ka nevoje për qindarkat. Kush nuk e kupton këtë tallje është budalla", tha Shehi.

Sa për një 'prill të dytë' mes Ramës e Metës, Shehi tha se nuk shikon asgjë të keqe pasi Rama e Meta kanë pasur zigzaget dhe pajtimet e tyre.

"Nuk shikoj, edhe nëse ka ndonjë gjë të keqe. Presidenti dhe kryeministri duhet të kenë një raport konstruktiv institucional. Rama-Meta kanë pasur zigzaget e tyre, janë puqur, janë ndarë...ne si opozitë kemi linjën tonë lineare", tha Shehi.

I pyetur nëse opozita ndihet e tradhtuar nga roli i Presidentit në këtë moment pandemie, Shehi tha se opozita nuk ndihet e tillë, pasi nuk e ka njohur ndonjëherë presidentin për kryetar të opozitës, përkundrazi e kanë mbështetur kur ai ka dalë në mbrojtje të Kushtetutës.

"Jo! Kush ka një vizion demokratit, nuk e përdor fjalën tradhtuar. Ne e kemi mbështetur dhe do ta mbështesim presidentin, sa herë të mbrojë kushtetutën. Ne nuk ndihemi të tradhtuar, se nuk kemi menduar se Presidenti është kryetari i opozitës, opozita e ka dhe goxha të mira, Presidenti të jetë mbi palët. Ai ka luajtur një aksion të vetin, e ka gjykuar kështu. Nuk e kemi njohur ndonjëherë presidentin për kryetar të opozitës", tha Shehi.

Në lidhje me funksionimin e koalicioni të opozitës me LSI, Shehi tha se deri më tani ka ecur dhe se në koalicion është i mirëprit kushdo, kurse vijë e kuqe për opozitën është vetëm Edi Rama.

"Deri tani ka funksionuar dhe unë uroj që të funksionojë. Ky është një koalicion i madh, ka parti të qendrës së djathtë, të qendrës së majtë, ka individë, grupe biznesi, sindikata. Në një situatë krize kaq të madhe. Zgjedhjet lokale nuk kemi marrë pjesë, krizë drejtësie, sot jemi pa gjykatë Kushtetuese, krizë mediatike, gjysma, treçereku janë nën thundrën e Ramës. Vija e kuqe për ne është bashkëpunimi me Ramën. Kush është kundër Edi Ramës për ne është i mirëpritur. Nëse vazhdon me këtë rrugë edhe për pak muaj dhe me këtë lloj shteti që i ka treguar të gjitha limitet e veta, kjo nuk është më çështje thjeshtë e opozitës, por e gjithashtu edhe e shqiptarëve. Shqiptarët duhet t'i vënë gishtin kokën ose do rrëzohen në një humnere që nuk do ta ngrenë kokën dot më", tha Shehi.

Kreu i LZHK-së, Dashamir Shehi u shpreh në Report Tv se opozita nuk ka në plan protestat, por mbrojtjen e qytetarëve. "Jo! Jo! Opozita nuk ka kërkuar protesta, Basha ka bërë një program me 5 pika për të zgjidhur situatën. Kjo është një situatë e rëndë dhe ditën kur të dalë copë copë Shqipërinë, kështu si po e dhunon Rama do të dalin të gjithë të humburit, socialistët të parët se kanë bizneset. Opozita nuk ka kërkuar protesta.

Ka mbajtur qëndrim të butë krahasuar me Europën. Kemi kërkuar që të ndjekë një linjë normale, si vendet e tjera, sa i përket regjimit shëndetësor, të shkojë të bëjë tamponet. Kemi 70 ditë brenda dhe janë bërë 7 mijë tampone, sa një fshat në Itali. Me këto rezultate që ka ky, nuk ka pse e shtyn gjendjen e jashtëzakonshme. Edhe opozita nëse do të marrë një Shqipëri të rrënuar nuk ka mundësi për ringritje" tha ai.