Publikohen pamjet e momentit të ekzekutimit të ish-efektivit të policisë, Arben Bilali, ngjarje kjo e ndodhur mesditën e të mërkurës në zonën e Selitës në kryeqytet (Lexo këtu). 50-vjeçari ka zbritur nga një automjet tip "Volkswagen Golf" me targa të huaja dhe ecën në drejtim të trotuarit, pranë banesës së tij, kur pas tyre afrohet një automjet tip "Mercedes Benz S" i zi dhe me targa të falsifikuara. Sapo Bilali ecën disa metra në këmbë, mes dyshimeve për automjetin që po i afrohet, pasi kthen vazhdimisht kokën në drejtim të vrasësve, këta të fundit zbrazin kallashnikovin mbi trupin e tij duke e lënë të vdekur në vend.
Pamjet janë shkëputur nga kamera sigurie e një biznesi aty pranë, ndërsa janë transmetuar sot nga Top Channel. Arben Bilali u qëllua me plot 14 plumba. Ai është qëlluar teksa makina ka qenë në lëvizje, duke iu fshehur kështu edhe identifikimit nga kamerat e sigurisë. Autorët dyshohet se e kanë njohur mirë zonën. Për grupin hetimor vrasja e Bilalit ka lidhje me ngjarjet tronditëse në Tiranën e viteve '90, ku janë shënuar disa atentate të përgjakshme mes disa familjeve. Vetë familja Bilali ka qenë në konflikt me atë Xhabafti, duke prodhuar disa viktima. Arben Bilalit i kishin vrarë edhe dy vëllezër, njërin në vitin 1997 dhe tjetrin në vitin 2010 (Lexo këtu), vetëm disa muaj pasi vetë ai i kishte shpëtuar një atentati po në zonën e Selitës.
