Rama në kantierin e ndërtimit në Fushë Krujë/ Ahmetaj: Javën tjetër ndryshohet buxheti i shtetit, 600 mln $ për rindërtimin (VIDEO)

FUSHË- KRUJË- Kryeministri Edi Rama ka qenë ditën e sotme në Fushë- Krujë për të inspektuar punimet për rindërtimin e lagjes së re për banorët e prekur nga tërmeti i 26 nëntorit. Në këtë lagje të re do të ndërtohen 100 apartamente dhe 128 njësi individuale, ku do të strehohen 1100 banorë. Lista me përfituesit, siç kryeministri Edi Rama sqaroi, është e mbyllur. E gjitha lagjja do të jetë e ndërtuar në një hapësirë prej 103 mijë m2, teksa shefi i qeverisë e cilësoi si një kthesë nga pikëpamja e arkitekturës.

"Krijon një gravitet të ri rreth e rrotull, se krijohet një lloj disipline e qëndrueshme. E pamundur që historia të vijoj si më parë, zona që krijojnë kthesa historie nga pikëpamja e arkitekturës. Gjithçka që do t'u ofrohet atyre që do prekën do të ofrohen shumë më shumë nga sa kishin. Lista se kush i përfiton këto banesa janë gati", tha Rama.

Kryebashkiaku i Krujës, Artur Bushi tha se kësaj hapësire do t'i bashkëngjitet edhe një treg, nisur nga fakti që është traditë e zonës. Nga ana tjetër, Rama tha se për këtë duhet një projekt i veçantë pa ta shndërruar atë në një treg model.

"Të bëhet një treg model, duhet bërë një projekt i veçantë që t'i bashkëngjitet se i shton shumë kapacitet nga pikëpamja komunitare dhe ajo ekonomike se transformimi i kushteve sjell një tjetër nivel të xhirove dhe ata që i shërbejnë dhe blejnë", tha Rama.

Jo 20 por 34 miliardë lekë do të financojë buxheti i shtetit për rindërtimin pas tërmetit të 26 nëntorit. Nuk dihet ende se cilit institucion do ti zbritet buxheti për të krijuar vlerën shtesë prej 14 miliardë lekësh që i shtohet fondit të rindërtimit. Ajo çka zbulon ministri Arben Ahmetaj është se këto ndryshime prezantohen javën e ardhshme.

"Me ndryshimet që bëjmë javën që vjen në buxhetin e shtetit, praktikisht do financohen 340 milionë dollarë nga buxheti i shtetit për rindërtimin këtë vit, pra 34 miliardë lekë, dhe 250 milionë dollarë ose 25 miliardë lekë vitin tjetër vetëm nga fondet e buxhetit të shtetit. Domethënë vetëm nga buxheti i shtetit do të financohen 600 milionë dollar", tha Ahmetaj.

Nuk është i vetmi lajm që vjen nga rishikimi i buxhetit. Nevoja për financimin e pasojave të covid dhe rindërtimit, pritet të rrisin edhe deficitin buxhetor, sepse rriten shpenzimet. Aktualisht ky deficit është 3,8 përqind e PBB ose 68,6 miliardë lekë.

Ndërkohë, më herët Rama ka vizituar kantierin për rindërtimin e shkollës, teksa meraku i kryeministrit ka qenë që t'i shtohet edhe një palestër godinës për nxënësit, por edhe komunitetin.

B.K.//Shqiptarja.com

TAG:
• edi rama
• fushe kruje
• arben ahmetaj
• rindertimi
• demet nga termeti