Rënia e Murit të Berlinit, Ilir Meta: Të punojmë për të mos u kthyer kurrë 30 vjet më parë

Presidenti Ilir Meta ka reaguar me një postim në rrjetet sociale për 30-vjetorin e rënies së Murit të Berlinit. Ai thotë se kjo ngjarje na kujton sot se duhet të ruajmë dhe të mbrojmë këto vlera për të mos u kthyer kurrë më në ato kohë!

"Rikthimi 30 vjet më parë, i lirisë, shtetit të së drejtës dhe të drejtave të njeriut në gjysmën e shtypur të Europës, na kujton sot se duhet të ruajmë dhe të mbrojmë këto vlera për të mos u kthyer kurrë më në ato kohë!" thotë Meta.

Ndërkohë që ambasada e SHBA-së në Tiranë thekson se që nga rënia e Murit të Berlinit, shumë vende kanë fituar lirinë nëpërmjet kutive të votimit, nëpërmjet presionit politik nga qytetarët, apo si rezultat i zgjidhjes së konflikteve të brendshme ose rajonale.

“Rënia e Murit të Berlinit më 9 nëntor 1989, shënon një pikë kthese në Luftën e Ftohtë dhe një pikë referimi domethënëse në fitoren e lirisë ndaj tiranisë. Muri qëndroi si një simbol i zymtë i ndarjes së njerëzve që jetonin të lirë dhe atyre që jetonin nën diktaturë. Ne nderojmë frymën dhe këmbënguljen e atyre që luftuan për liri në Gjermaninë Lindore dhe në regjime të tjera shtypëse.

Që nga rënia e Murit të Berlinit, shumë vende kanë fituar lirinë nëpërmjet kutive të votimit, nëpërmjet presionit politik nga qytetarët, apo si rezultat i zgjidhjes së konflikteve të brendshme ose rajonale. Ne nderojmë lirinë e re në të cilën jeton sot pjesa më e madhe e botës”.

TAG:
• Ilir Meta
• Muri i Berlinit