Report Tv çel dyert e ‘shtëpisë së re’, me qëllimin e përhershëm për të sjellë të vërtetën me çdo kusht

TIRANË- 25 shtator 2022, kjo datë është një moment shënjues për historinë e Report Tv, ku pas 10 vitesh sot ka hyrë në një “shtëpi të re”, një investim i jashtëzakonshëm në infrastrukturë, por me mision të njëjtë,  “për të thënë të vërtetën me çdo kusht”. Sot në orën 10:00, gazetari Andi Kapxhiu iu drejtua shikuesve besnikë të televizionit tonë nga një studio e re, që reflektonte punën e palodhur në prapaskenë të të gjithë punonjësve për më shumë se gati 2 vitesh.

Godina e re, tashmë është përfunduar dhe çdo emision do të vijë me ambiente të reja që janë konceptuar dhe janë vënë në zbatim vizualisht me fjalën e fundit të teknologjisë. 

“Në emër të stafit drejtues dhe të gjithë kolegë kam nderin dhe privilegjin t’ju komunikojë se sot ju flas nga studiot e reja të Report Tv. Nga shtëpia jonë e re që do të jetë edhe shtëpia juaj. Një investim i jashtëzakonshëm me qëllimin kryesor për të realizuar mision tonë për të vërtetën me çdo kusht për të qenë të paanshëm dhe gjithmonë në shërbim të qytetarit”, ishte ky mesazhi i Andi Kapxhiut në nisje të transmetimit live.

LEXO EDHE:
Ata që i kanë gjërat me të dëgjuar dhe ata që i jetojnë

Kjo e diel vijon me edicionet informative për të sjellë në kohë reale çdo zhvillim të aktualitetit, teksa të hënën do të startojë edhe sezoni i ri televiziv, me shumë risi, jo vetëm në formë, por edhe në përmbajtje, ku shtylla kryesore të do jetë pikërisht cilësia.

Ëndrra e cila nisi me sakrificë dhe punë 10 vite më parë nga botuesi Carlo Bollino me krijimin e Report Tv, sot sheh realizimin e një hapi gjigand, drejt përmbushjes së qëllimit për t’i dhënë shqiptarëve një dritare të së vërtetës, ku interesi publik është misioni i vetëm.

B.K./SI.E./Shqiptarja.com

TAG:
• media
• report tv