Masakra e Peshkëpisë/ Pas rihapjes së dosjes arratiset Fredi Bejleri, kandidoi me opozitën për Himarën në 2015

Komandanti i repartit të Peshkëpisë Fatmir Shehu ishte njëri nga dy personat që u vranë në Prill të 1994 nga sulmi i terroristëve grekë. Por si e kujton vëllai i tij, Fiqiri Shehu atë ngjarje dhe a ka besim se rihapja e dosjes do të vendosë autorët para drejtësisë.

"Isha vetë në ngjarje, mora pjesë në hetime. Kam shumë besim që do të shkojë deri në fund. Shpresoj që me këtë ndryshim të madh që u bë të përfitoj të drejtën vëllai që është vrarë" tha Fiqiri Shehu, vëllai i Fatmir Shehut.

Avokati Ilir Majlindi në një intervistë për gazetarin Elton Qyno (LEXO të plotë) tregon se si e mori vesh informacionin se do të sulmohej posta në Peshkëpi në 1994, por ambasada shqiptare në Athinë, tregon ai, e injoroi alarmin që ai ngriti.  "Në 1994 kam qenë me familjen në Athinë. Unë kisha marrëdhënie me shqiptarët që kishin emigruar. Para se të ndodhte masakra, një mikut tim kjo organizatë, 'MAVI' i kishte shkuar në shtëpi dhe i kishin qëlluar gruan në dorë, për shkak të propagandës.

Ishte koha kur Greqia ishte ngritur në këmbë për të pushtuar Vorio Epirin. Kjo organizatë 'MAVI' më thotë shoku im kanë ndërmend që të bëjnë një sulm, unë iu drejtova ambasadës, por më del një diplomat i quajtur 'Ahmed', më thotë 'leri këto punë por ruaj dhe ndonjë punë këtu në Greqi'. Në prill mësoj që ka ndodhur një ngjarje e rëndë, ajo e Peshkëpisë. E takoj mikun tim dhe i them ku e dije ti, ai më thotë se jam në dijeni dhe më thotë unë di edhe emrat. Shkova në ambasadë, por më thonë 'ik, ç'po të duhet'" tregoi ai.

Një tjetër emër që ka marrë pjesë në masakrën e Peshkëpisë ka qenë edhe Harallamb Papa, asokohe 21 vjeç, së bashku me vëllanë e tij, Jorgo Papa. Por, kjo nuk e ka penguar aspak që të hyrë dhe të dalë lirisht nga Shqipëria, i pa shqetësuar, herën e fundit në ceremoninë e vrasjes së minoritarit grek Kostandin Kacifas në muajin tetor të vitit të kaluar.

Harrallambos Papas gjatë takimeve në Himarë

Harrallambos Papas ne ceremonine e Kacifasit

Fredi Bejleri është njëri nga personat që kanë marrë pjesë masakrën e Peshkëpisë nga komando greke ‘Pirro i Parë’ në vitin 1994. Por, pas hapjes së dosjes nga Prokuroria ai është arratisur nga Shqipëria. Gazetari Elton Qyno thotë se pas tërheqjes së dosjes nga Gjirokastra ka pasur rrjedhje informacioni duke sjellë edhe arratisjen e Bejlerit nga Shqipëria.

"Hapja e hetimit ka sjellë edhe reagimin e personave që përmenden, nga Fredi Bejleri. Kam dijeni që Fredi Bejleri është larguar nga Shqipëria, pak ditë përpara. Kjo tregon se informacioni i tij, apo shërbimet greke. Informacioni për hapjen e dosjes ka shkuar më parë se ai. Kjo mund të jetë e para rrjedhje informacioni, është bërë tërheqja e dosjes, është kërkuar informacion për lokalizimin e dëshmitarëve dhe në këtë moment kanë informuar njëri tjetrin. Që të kërkosh arrestimin dhe arrestimin nuk mund të bëhet pa prova. Hetimi tani ka filluar" tha ai.

Sadik Bejko, ish-deputet i Partisë Demokratike në Parlamentin shqiptar nga viti 1992 - 1997 rrëfeu sonte në Report Tv se si u përjetua sulmi në repartin e Peshkëpisë. "Unë kam qenë deputet i Tepelenës, me banim në Gjirokastër dhe gruan e Fatmir Shehun e kam pasur përballë, ka qenë kuzhiniere dhe ai i ri.

Me makinën time kam shkuar dhe kam marrë nënën dhe gruan e tij, ka qenë ngjarje e rëndë, lebetitëse. Për mua ishte ngjarje e hidhur. Ngjarja e dytë, ishe se ne ishim mësuar se Shqipëria është një vend i mbrojtur, ka kufij dhe ushtri, por pa pritur dhe kujtuar u mor peng një repart ushtarak, kjo ishte fyerje dhe goditje. Kjo ishte një provë force.

Ngjarja kaloi në nivele të larta. Familja ishte e varfër, nëna mori pjesë në ceremoninë e varrimit me shapka, pasi nuk kishin, ishin të varfër. Por pse ndodhi kjo? Për faktin se ushtarët ishin pa armë në tre muajt e parë, pasi ishin në karantinë. Pasi kaloje këtë muaj, ti ishe bërë i aftë, merrje armën dhe bëheshe i aftë. Kjo ishte papërgjegjësi e madhe, si mund të marrësh 130 djem dhe ti leshë pa armë" tha ai.

Fredi Bejleri është njëri nga personat që kanë marrë pjesë masakrën e Peshkëpisë nga komando greke ‘Pirro i Parë’ në vitin 1994. Por, pavarësisht kësaj, Fredi Bejleri në 2015 kandidoi për të qenë kryetar i bashkisë së Himarës në siglën e PBDNJ dhe i mbështetur nga opozita e djathtë. 

"Sa herë që kishte zgjedhje, këta persona më dilnin përpara në Himarë" tha Artan Hoxha. Ndërsa Shpëtim Idrizi tha se 'edhe Kostandin Kacifas që u vra në Bularat vjet ishin anëtarë i kësaj organizate terroriste".

Komando greke ‘Pirro i Parë’ që realizoi sulmin
-Jorgo Anastasulis, 34 vjeç, oficer i ushtrisë greke me gradën toger.
-Apostolos Karvelas, 26 vjeç, punonjës i policisë greke.
-Mario Kutulla, 25 vjeç, shtetas shqiptar nga Himara, banues në Athinë, punëtor.
-Fredi Bejleri, 23 vjeç, shtetas shqiptar nga Himara, banues në Athinë, me profesion hidraulik.
-Jorgo Kristo, 26 vjeç, shtetas shqiptar nga Himara, banues në Athinë.
-Harallamb Papa, 21 vjeç, shtetas shqiptar, banues në Athinë, punëtor ngarkim – shkarkimi.
-Jorgo Papa, 30 vjeç me profesion teknik frigoriferësh, vëllai i Harallamb Papas.

Gazetari investigativ Artan Hoxha thotë se masakra e Peshkëpisë ka mbetur pa autorë për 25 vite edhe për arsye se nga pala greke ka qenë e vështirë për të gjetur bashkëpunim, pasi ka pasur rol edhe agjentura greke.

"Aty kanë luajtur rol edhe agjentura greke, ky ka qenë edhe fati që ka qenë vështirë për të gjetur bashkëpunim nga pala tjetër. Reparti ndodhet në vijë ajrore jo më shumë se 3 km nga kufiri grek. Ata erdhën një ditë para, kanë pasur informacion që ushtarët shqiptarë nuk kishin armë me fishekë.

Pritën mesnatën dhe duke ditur që gjatë natës kishte rekrutë të rinj. Ushtari Arsen Gjini ka pasur një armë pa fishekë në dorë, e vranë dhe brenda dy minutash u futën brenda repartit. Armët ishin në kasafortë të kyçura".

Rihapja e dosjes së masakrës së Peshkëpisë pritet që të sjellë zhvillime të reja. Por pse u rihap kjo dosje tani? Gazetari i Shqiptarja.com Elton Qyno thotë se kanë qenë disa informacione nga drejtoria e Anti-terrorit që solli rihapjen e dosjes. "Ka qenë një informacion i drejtorisë së anti-terrorit që solli hapjen e kësaj dosje. Ai është akt terrorist. Këta oficerë kanë referuar materialet në prokurori dhe kanë kërkuar rihapjen e cështjes, pasi konstatuan se dosja kishte mangësi.

Momentalisht nuk ka asnjë fajtor, asnjë i arrestuar. Ushtarët që kanë qenë janë pyetur dhe nuk u është dërguar asnjë letër porosi grekëve. Nuk ka pasur asnjë bashkëpunim mes dy shteteve për informacion për zbardhjen e kësaj cështje. Organizata 'MAVI' njihet si terroriste edhe në Greqi, por dëmin e ka bërë në Shqipëri" tha ai.