Shirat e parë të vjeshtës sjellin probleme në qarkullim/ Breshëri i madh dëmton pemët frutore në Konispol, përmbyten rrugët në Durrës, Lushnje dhe Lezhë (VIDEO)

Shqipëria u përfshi ditën e sotme nga shirat e dendura për disa orë duke shkaktuar përmbysje në shumë qytete. Shirat në Ksamil kanë shkaktuar avari në stacionin e pompimit të ujërave të zezë duke sjellë përmbytje dhe daljet të ujërave të zeza në sipërfaqe.

Gjithashtu nga ky problem ka përmbytur edhe një banesë e cila është 'nën pushtetin' e ujërave të zeza. Ujërat e zeza kanë dëmtuar të gjitha mobiliet dhe e kanë bërë atë të pabanueshëm dhe të rrezikshëm për shëndetin e banorëve që jetojnë aty.

Breshëri i rënë mëngjesin e sotëm në zonën e Konispolit ka shkaktuar shumë dëme në bujqësi. Por, përveç tyre ka pasur edhe dëme materiale.

Në foto shihet se nga breshëri janë thyer xhamat e një automjeti, duke e bërë thërrime. Breshëri ka pasur përmasën sa të një topi ping-pongu.

Shirat e parë të stinës së vjeshtës kanë përmbytur tre akse rrugore në Durrës, tek stacioni hekurudhor, te kryqëzimi i stadiumit dhe rruga që të shpie për në Currila.

Siç duket edhe nga videot e mbërritura në redaksinë e Shqiptarja.com, rrugët janë mbuluar nga uji i shirave dhe makinat kanë pasur vështirësi në qarkullim.

Nga përmbytja e rrugëve, ka bërë që uji të hyjë edhe në katet e para të bizneseve që janë në rrugë.

Nuk është hera e parë që përmbyten rrugët e Durrësit, nga 10 minuta shi i rrëmbyeshëm. Mungesa e kanalizimeve bën që Durrësi të përmbytet sa herë që bie shi, ndërkohë që akoma nuk merren masa konkrete në lidhje me këtë problem.

KONISPOL- Shiu i parë  në këtë fillim vjeshte ka rënë pothuaj në gjithë rajonin e jugut, por pa krijuar probleme serioze. Por, ndryshe ka qenë kjo situatë në Bashkinë e Konispolit, ku ka rënë shumë breshër, i pazakontë ku madhësia e tij, pasi shkonte sa një top pinpongu.

Në fotot e sjella nga gazetari i Report Tv, vërehet një sasi e madhe breshëri që ka rënë në sipërfaqe të tokës. Breshëri ka dëmtuar mandarinat dhe pemët e tjera të fermerëve në Konispol, duke sjellë një dëm ekonomik për banorët e zonës, pikërisht në kohën kur po niste vjelja e këtyre pemëve.

Kryetari i bashkisë, Shuaip Beqiri, thotë se si pasojë e breshrit, janë dëmtuar shumë pemë frutore.

Nga verifikimi paraprak në terren nga grupet e punës vërehet se 30 për qind e prodhimit në agrume, mandarina e portokalle është dëmtuar, ndërkohë që dëmtimi tek ullinjtë është edhe më i  shumtë.

Në qytetin e Kukësit, në mungesë të burimeve ujore dhe thatësirës, reshjet me intensitet të lartë kanë sjellë bereqet për këtë vend. Deri në këto momente nuk raportohet për probleme në këtë qytet.

Reshjet ishin pozitive për rritjen e burimeve ujore në bazenet ujëmbledhëse të ujësjellësit dhe rritjen e Liqenit të Fierzës, aktualisht Fierza është në nivelin 277m, ndërsa furnizimi me ujë i banoreve të qytetit është 3 orë në dite nga10-20 minuta që ishte si pasojë e reshjeve gjatë verës.

Reshjet e dendura të shiut në qytetin e Lushnjes zgjatën rreth 10 minuta sollën përmbytjen e rrugëve në këtë qytet.

Sistemi i evadimit të ujërave sipërfaqësore doli jashtë funksionit për rreth gjysmë ore. Radhë të gjata automjetesh janë krijuar në rrugë në pikun e lëvizjes në mëngjes. Disa akse rrugore kanë mbetur të paralizuara.

Dita e sotme është nisur me reshje shiu me intensitet të lartë, duke shkaktuar probleme në disa qytete kryesore të vendit.

E mërkura në Fier nisi me reshje me intensitet herë pas here me shkarkime atmosferike, e shoqëruar me erë të fortë. Era ka zgjatur për disa minuta.

Deri në këto momente nuk ka pasur probleme në qarkullim, ndërkohë që në disa qytete të tjera, janë përmbytur rrugët nga shiu që ra në mëngjes.