Si dy plaka që mallkojnë: 'S’keni për t’i gëzuar'

Lulzim Basha dhe Ilir Meta

Përpjekja e Ilir Metës për të krijuar idenë se ka një plan të ri për “përmbysje të pushtetit me dekrete”, dhe udhëtimi i Lulzim Bashës në Presidencë për t’u njohur me arsyet përse duhet bërë kjo përmbysje, nuk kanë lidhje me ndonjë revolucion. Nuk kanë lidhje as me shqetësimin vërtet serioz që Ilir Meta ka se mos Gjykata Kushtetuese formohet me anëtarë që nuk janë nën kontrollin e tij, dhe kështu do ta shkarkojnë si President. Ai pak a shumë është i qartë që do të shkarkohet.

Takimi i sotëm i tij me Lulzim Bashën dhe deklaratat e përbashkëta për një revolucion të ri, janë një mënyrë tipike e Ilir Metës për t’iu përgjigjur shqetësimit që ai ka nga suksesi ndërkombëtar i Edi Ramës, në fushatën për mbledhjen e fondeve.

Dy njerëz si ata, Ilir Meta dhe Lulzim Basha, që gjithë jeta politike u vërtitet rreth parave, kanë arsye madhore të jenë të shqetësuar, se pikërisht tragjedia më e madhe që pllakosi vendin, po kthehet në favor të qeverisë, duke siguruar më shumë mjete financiare se sa nevojiten, për rindërtimin e vendit.

Si dy njerëz që dështuan të dëshpërojnë Perëndimin dhe ta mbajnë larg Shqipërisë, si opozitarë që nuk ja dolën dot t’i mbushin mendjen botës, se Edi Ramës nuk i duhet besuar asnjë qindarkë, dhe aq më keq, si politikanë që nuk kanë akses tek fondet që do të përdoren për rindërtim, ata sot kanë bërë një përpjekje të dëshpëruar, si ato plakat që mallkojnë nga sofatet e shtëpive e thonë “S’keni për t’i gëzuar”.

Për kaq vlen gjithë takimi i sotëm. Dy politikanë të dëshpëruar, që mendojnë se po të kishin marrë ata aq shumë para, do t’i përdornin për pushtet, sot janë bërë bashkë të bëjnë një plan, se si ta bëjnë të pamundur që paratë që bota dha për Shqipërinë, të mos përdoren pa e djegur dhe këta  një herë Shqipërinë.

Ky natyrisht është një pretendim që nuk guxojnë ta thonë më publikisht, pasi pranverën e kaluar e thanë dhe tentuan ta bëjnë, por dështuan.

Tani shpresojnë thjesht ta ulin euforinë e shumicës në vend për donacionet e dhëna për tërmetin, duke krijuar idenë se kanë dhe ata një plan kundër këtyre donacioneve.

Dhe ky plan, sipas tyre, kalon nga shpërndarja e Parlamentit, nga dekretet që do të nxjerrë Presidenti dhe pastaj nga mbështetja që opozita e Lulzim Bashës do t’i japë kësaj skeme.

Është për të qeshur dhe për të qarë, se si dy njerëz, që kanë në dorë fatet e opozitës në Shqipëri, mblidhen e qajnë kokë më kokë, një ditë pasi thuajse gjithë shqiptarët ndjehen mirënjohës ndaj donatorëve dhe kryeministrit, që ka mundur t’i bindë për të ndihmuar Shqipërinë.

Më lehtë do ta kishin të bënin dhe ata si të gëzuar, që të mos i ndanin shqiptarët, pro atij që ka gjetur 1.15 miliardë euro për ta, dhe atyre që janë bërë helm pse i ka gjetur këto para.

Por fatkeqësisht ata po e kthejnë në betejë, dhe po duan t’i ndajnë vërtetë shqiptarët, pro dhe kundër shifrës 1.15 milardë euro, duke ja bërë  jo vetëm dhuratë financiare, por dhe politike Edi Ramës, këtë histori.

m.v./Shqiptarja.com
  • Sondazhi i ditës:

    COVID-19/ A keni arritur të bëni aplikimin për të marrë leje për dalje nga shtëpia?

Komento