Spanja mirëpret emigrantët, si një zgjidhje për shpopullimin

Spanja mirëpret emigrantët, si një zgjidhje për shpopullimin

Pjesa më e madhe e Evropës perëndimore po pëson tkurrje të popullsisë, por ky problem është veçanërisht i pranishëm në Spanjë, ku qeveria thotë se mbi gjysma e bashkive të vendit rrezikojnë të shpopullohen për shkak të eksodit nga zonat rurale, me shumë të rinj që po zhvendosen drejt qyteteve të mëdha, ose që zgjedhin të mos kenë fëmijë. Nga qyteti katalonas Vilada, korrespondenti i Zërit të Amerikës, Alfonso Beato, na sjell historinë e një emigranteje nga Hondurasi dhe tre fëmijëve të saj, që po i sjellin jetë të re një komuniteti që po mpaket

Spanja ka një ndër nivelet më të ulëta të lindshmërisë në Bashkimin Evropian dhe zonat e saj rurale po përjetojnë një rënie të shpejtë të popullsisë. Qytete të tëra kanë mbetur me banorë të moshuar dhe të ardhura në rënie.

“Një humbje popullsie me njëqind veta në dy vite, për një qytet si tonin do të thotë rënie të popullsisë me 20% dhe kjo pasohet me humbjen e shumë shërbimeve, humbjen e shërbimeve mjekësore. Shkolla është konsoliduar, por edhe ajo rrezikohej të mbyllej”, thotë Joaquim Espelt, kryebashkiak i Viladas.

Marelin Moradel nga Hondurasi dhe tre vajzat e saj u mirëpritën krahëhapur në këtë qytezë të qetë në malet e Katalonias. Banorët që kanë mbetur e shohin ardhjen e tyre si një rigjallërim të komunitetit.

“Ajo që më pëlqen më shumë është se njerëzit të flasin edhe pa të njohur. Të thonë ‘si je?’ dhe pastaj fillojnë të pyesin ‘si po të shkon dita?’, apo të pyesin për familjen dhe përpiqen të të afrojnë”, thotë zonja Moradel.

Katalonia ka filluar një projekt pilot për të inkurajuar vendosjen e njerëzve në qytezat si Vilada. Këshilli i qytetit ka tërhequr kështu Marelinën së bashku me tre vajzat e saj, duke shpresuar se ato do të dëshirojnë të qëndrojnë dhe të krijojnë jetën e tyre në këtë qytezë malore.

Në këtë projekt po marrin pjesë 30 qytete të Katalonias, duke tërhequr emigrantë që vijnë nga vende si Ukraina, Siria, Kolumbia, Afganistani dhe Venezuela.

“Për ne, kombësitë janë të gjitha njëlloj në fund të ditës. U ofrojmë mundësinë familjeve, me prejardhje dhe gjendje ekonomike të ndryshme, të jetojnë në këtë mjedis rural”, thotë Oriol Lopez, nga Shoqata e Mikropopullsive të Katalonias.

Marelin e konsideron të rëndësishme sigurinë personale, që luajti një rol të madh në vendimin e saj për të ardhur në këtë qytet të vogël. Ajo jetonte më parë në El Raval, një lagje e Barcelonës me popullsi nga kultura të ndryshme, ku ajo përjetoi një nivel rrezikshmërie, në veçanti për adoleshentët.

“Ajo që më pëlqen në Vilada është se vajzat e mia mund të dalin lirisht. Nuk kam frikë se qëndrojnë përjashta deri në 8 apo 9 të darkës. Nuk kam ndonjë kufizim për orarin se kur duhet të kthehen në shtëpi, pasi kur janë jashtë, e di se më kë janë dhe kë kanë përreth”, thotë ajo.

Njerëzit shpesh zgjedhin të zhvendosen nga zonat urbane drejt zonave rurale për shkak të faktorëve si siguria dhe mundësive më të mira për strehimin.

Kjo ofron shpresë për banorët e Viladas që po përpiqen të ruajnë gjallërinë e qytetit të tyre./ VOA

M.Q./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

Shpërthen bombola e gazit, merr flakë apartamenti në Patos, nuk ka të lënduar

Shpërthen bombola e gazit, merr flakë apartamenti në Patos, nuk ka të lënduar