Raketat ruse mbi Kiev, shpëton një vajzë e vogël! Qeveria: Rusia ka vjedhur 400 mijë ton grurë

Raketat ruse mbi Kiev, shpëton një vajzë e vogël! Qeveria: Rusia ka vjedhur 400 mijë ton grurë

Bombardimet sot në Kiev

President i Ukrainës Volodymyr Zelensky  tha se Ukraina do të rimarrë qytetet që ka humbur, përfshirë Severodonetskun, gjatë një fjalimi me video të postuar në kanalin e tij në "Telegram". 

Ai tha se në 24 orët e fundit Ukraina është goditur nga 45 raketa dhe raketa ruse. Por, shtoi se "asgjë nuk ndryshon" sepse "asnjë raketë ruse, asnjë sulm nuk mund të thyejë shpirtin e ukrainasve". 

“Okupatorët, duhej të kishin pushtuar pjesën më të madhe të vendit tonë në ditën e pestë dhe për të pestën muaj janë të detyruar të bëjnë një shfaqje të tillë raketore, e cila strategjikisht nuk ndryshon asgjë për Rusinë”, tha Zelensky.

Në orët e para të mëngjesit të sotëm Kievi pësoi një sulm me raketa.

Sipas gazetës amerikane "New York Times", forcat speciale të NATO-s dhe njerëzit e CIA-s veprojnë në territorin ukrainas.

Britania, Shtetet e Bashkuara të Amerikës, Japonia dhe Kanadaja do të ndalojnë importet e reja të arit rus si pjesë e përpjekjeve për të shtrënguar sanksionet ndaj Moskës për pushtimin e saj në Ukrainë.

“Ndalimi do të hyjë në fuqi së shpejti dhe do të zbatohet për arin e sapo nxjerrë ose të rafinuar. Masa nuk do të ndikojë në arin e eksportuar më parë me origjinë ruse”, thuhet në deklaratën e qeverisë që u bë publike përpara nisjes së një takimi të udhëheqësve të G7 në Gjermani.

Iniciativa e fundit pason pezullimin e marsit të Shoqatës së Tregut të Shufrave në Londër (LBMA) të akreditimit për gjashtë prodhuesit rusë të metaleve të çmuar.

Nga Moska, zëdhënësi i Ministrisë së Mbrojtjes, gjenerallejtënant Igor Konashenkov tha se forcat ruse kanë kontroll të plotë të Severdonetsk dhe Borivske fqinje. Tani ushtria e Moskës, së bashku me milicitë e Republikës së vetëshpallur të Luganskut, kanë hyrë në Lysychansk, bastioni i fundit i Ukrainës në Donbass.

Rendit zhvillimet sipas orarit:
Ora 21:56
 Blinken: Putini ka dështuar në Ukrainë, ai nuk i ka arritur qëllimet e tij

Në Ukrainë "Putini ka dështuar në lidhje me objektivat e tij strategjikë". Kështu ka deklaruar Sekretari Amerikan i Shtetit, Antony Blinken. I intervistuar nga CNN , kreu i diplomacisë amerikane vërejti se "objektivi strategjik i Putinit ishte t'i jepte fund sovranitetit dhe pavarësisë së Ukrainës, ta fshinte atë nga harta, ta përfshinte në Rusi. Ai dështoi". Blinken më në fund shtoi se "një Ukrainë sovrane dhe e pavarur do të qëndrojë e gjallë shumë më gjatë sesa Vladimir Putin do të mbetet në skenë".

Ora 21:45
Draghi në G7 flet për nevojën urgjente për të zhbllokuar eksportet e grurit ukrainas

"Ne duhet të përshpejtojmë përpjekjet tona në frontin e sigurisë ushqimore. Është thelbësore të zhbllokojmë grurin në Ukrainë shumë përpara mesit të shtatorit, kur të arrijë korrja e re. Ne duhet të japim mbështetjen tonë të plotë për Kombet e Bashkuara, në mënyrë që të mund të vazhdojë. më shpejt në punën e tij të ndërmjetësimit”. Sipas asaj që mësohet, këtë e ka thënë kryeministri Mario Draghi gjatë seancës së parë të punës së G7. 

Deri më tani, negociatat për zhbllokimin e porteve jugore të Ukrainës për të lejuar largimin e anijeve nuk kanë çuar në një marrëveshje. Bisedime të reja priten në Turqi këtë javë . 

Ora 13:45
Lavrov: Ukraina nuk ka histori pa popullin rus

Ministri i Jashtëm rus, Sergej Lavrov në një postim të tijin në Twitter shprehet se historia e Ukraniës është e lidhur me popullin rus.

“Ukraina është përpjekur të ndërtojë sovranitetin e saj duke fshirë historinë e saj. Por nuk ka histori pa popullin rus, absolutisht asnjë”, tha ministri i Jashtëm rus, Sergey Lavrov , në një postim në Twitter të publikuar nga ambasada ruse në Mbretërinë e Bashkuar.

Ora 13:30
Scholz: Jemi të bashkuar, ky është mesazhi ynë për Putinin

Kancelari gjerman Olaf Scholz, ka zhvilluar një takimi me presidentin amerikan Joe Biden në Elmau, ku po zhvillohet samiti i G7-ës. Kancelari Scholz, nëpërmjet një postimi në Twitter shprehet se bashkimi është një mesazh i qartë për Putin.

“Jemi të bashkuar, jemi bashkë. Ky është mesazhi ynë i qartë për Putinin. Është mirë që jeni këtu në samitin e G7, me Presidentin Joe Biden.", shkruan Scholz në Twitter:

Ora 13:10
Momenti prekës kur vogëlushja nxirret e gjallë nga rrënojat në Kiev! Babai humbi jetën nga sulmet ruse

 

Një vogëlushe 7-vjeçare është nxjerrë e gjallë nga rrënojat e sulmeve ruse mbi Kiev, që u regjistruan në orët e para të mëngjesit të sotëm, ndërsa babai i saj humbi jetën.

Ministri i Jashtëm ukrainas Dmytro Kuleba postoi në Twitter imazhet e vajzës së vogël, e nxjerrë gjallë nga rrënojat e ndërtesës së bombarduar në Kiev ditën e sotme, ku shkroi:

"Kjo vajzë 7-vjeçare ukrainase flinte e qetë në Kiev derisa një raketë ruse godit shtëpinë e saj. Shumë të tjerë në Ukrainë janë nën sulm. Samiti i G7 duhet të përgjigjet me më shumë sanksione për Rusinë dhe më shumë armë të rënda për Ukrainën. Imperializmi i sëmurë rus duhet të mposhtet”.

Ora 12:56
Biden: G7 dhe NATO u bashkuan kundër agresionit të Ukrainës

G7 dhe NATO duhet të qëndrojnë të bashkuar kundër agresionit rus të Ukrainës, pavarësisht nga ajo që Moska ka parashikuar dhe shpresuar. Kështu deklaroi presidenti amerikan Joe Biden në Bavari, para takimit, me kancelarin Olaf Scholz, pak para fillimit të samitit të G7 në Kështjellën Elmau. “Ne duhet të qëndrojmë të bashkuar – tha Biden – NATO dhe G7 nuk do të ndahen. Nuk ka ndodhur dhe nuk do të ndodhë”.

Ora 11:52
Ukraina: Ushtria ruse sulmoi Kievin me të paktën 14 raketa

'Të paktën 14 raketa ruse janë lëshuar në Kiev në agim.", kështu deklaroi Deputeti ukrainas Oleksiy Goncharenko, sikurse raportohet edhe nga "Nexta TV".

Ora 10:40
Kievi: 339 fëmijë të vrarë, të paktën 613 fëmijë të plagosur që nga fillimi i luftës

Numri i fëmijëve të lënduar në Ukrainë që nga fillimi i pushtimit rus ka arritur në 613, ndërsa numri i fëmijëve të vrarë është 339.

Të dhënat u raportuan nga Zyra e Prokurorit të Përgjithshëm.

Ora 10:35
Nis sot Samiti i G7, tema e diskutimit do të jetë Ukraina dhe pasojat e luftës! Paralajmëron ndalesën e arit rus

Liderët e grupit të shtatë vendeve më të industrializuara të botës (Shtetet e Bashkuara, Mbretëria e Bashkuar, Gjermania, Franca, Italia, Kanadaja dhe Japonia) (G7), do të mblidhen për një samit dyditor në Gjermani.

Liderët e këtyre shteteve pritet të bëjnë të ditur ndalesë të re në importet e arit rus, me qëllim të ashpërsimit të sanksioneve ndaj Rusisë, për shkak të nisjes së luftës në Ukrainë.

Rusët e pasur kanë blerë sasi të konsiderueshme të arit së fundi, me qëllim të uljes së ndikimit të sanksioneve ndërkombëtare për shkak të pushtimit rus në Ukrainë që ka nisur më 24 shkurt, ka thënë Qeveria britanike përmes një deklarate.

“Këto masa do të godasin drejtpërdrejt oligarkët rusë dhe do të godasin zemrën e makinerisë së luftës së presidentit rus, Vladimir Putin”, ka thënë kryeministri britanik, Boris Johnson përmes një deklarate.

Londra ka thënë se eksportet ruse të arit kanë kapur vlerën e më shumë se 15 miliardë dollarëve vitin e kaluar.

Ndalesa pritet të bëhet e ditur më 27 qershor, dhe do të zbatohet shpejt.

Ky vendim do të zbatohet për arin e nxjerrë nga toka, si dhe atë të rafinuar, kanë thënë zyrtarët.

Presidenti amerikan Joe Biden ka thënë përmes një postimi në Twitter se ndalesa në arin rus, përbën një tjetër “kosto të pashembullt për Putinin, në mënyrë që t’i ndalohen fondet që i duhen për të financuar luftën kundër Ukrainës”.

Biden e ka quajturin arin si “eksport masiv që siguron dhjetëra miliarda dollarë për Rusinë”.

Liderët e G7-ës do të nisin takimet më 26 qershor në rajonin e Bavarisë në Gjermani dhe do të vazhdojnë me samitin e NATO-s që mbahet më 29 qershor në Madrid, Spanjë.

Ora 10:20
Sulmet ruse në Kiev: Dy të plagosur, një vajzë 7-vjeçare nxirret e gjallë nga rrënojat, në kërkim të nënës së saj

Dy persona kanë mbetur të plagosur dhe janë dërguar në spital, pas sulmit me raketa në Kryeqytetin ukrainas Kiev.

Lajmin e bëri të ditur Kryebashkiaku Vitali Klitschko,i cili tha se raketat ruse goditën të paktën dy ndërtesa banimi në lagjen Shevchenkivskyi të qytetit. Ekipet e shpëtimit po punojnë për të çliruar njerëzit e bllokuar nën rrënoja dhe më pas njoftojnë se kanë nxjerrë një vajzë shtatëvjeçare.

“Ajo është gjallë. Tani ata po përpiqen të shpëtojnë nënën e saj', tha Kryebashkiaku.

Ora 09:33
Sanksion i ri, G7 do të shpallë ndalimin e importit të arit rus, burimi i dytë më i madh i të ardhurave nga eksporti për Moskën

Mbledhja e G7-së që pritet të mbahet sot në Mynih, do të sjellë një sanksion të ri kundër Rusisë.

Janë katër vende të G7-së që do të ndalojnë arin rus. Iniciativa e ndërmarrë nga Mbretëria e Bashkuar, Kanadaja, Japonia dhe Shtetet e Bashkuara parashikojnë të godasin drejtpërdrejt oligarkët rusë.
Qeveria britanike shpjegoi se produktet e reja do të ndalohen, jo ari rus që tashmë ishte eksportuar nga Rusia në javët e fundit.

Konfirmimi i ndalimit të arit rus vjen edhe nga llogaria në Twitter e presidentit amerikan Joe Biden, e cila është një ndalesë me vlerë dhjetëra miliarda dollarë.

 

Ora 08:30
Kryebashkiaku i Kievit: Moska po përpiqet që të na frikësojë përpara samitit të NATO-s

"Rusia përpiqet të 'frikësojë ukrainasit' para samitit të NATO-s me sulmin me raketa kundër Kievit", deklaroi Kryebashkiaku i Kievit, Vitali Klitschko.

 

Ora 08:20
'Fundi i Putinit do të vijë nga miqtë e tij, nëse Rusia fillon të humbasë, nis lufta për pushtet', flet ish-shefi i CIA-s

Ish-shefi i stacionit të CIA-s në Moskë, Daniel Hoffman, pretendon se fundi i liderit rus Vladimir Putin do të vijë nga miqtë e tij, të cilët do të përpiqen t'a rrëzojnë fshehurazi presidentin nëse pushtimi i tij në Ukrainë fillon të 'dalë jashtë-kontrollit dhe parashikimit'.

“Këta njerëz që do ta bëjnë këtë do të jenë aq të fshehtë saqë Putin nuk do të mundet t'i gjejë dhe t'i vrasë më parë,” u shpreh Hoffman.

“Do të ndodhë krejt papritur. Dhe ai do të jetë i vdekur.”, shtoi ai.

Ish-shefi i Inteligjencës tha se anëtarët e rrethit të tij të brendshëm mund të vendosen për një kryengritje për të marrë në dorë kontrollin e konfliktit.

“Askush nuk do të pyesë, 'Hej Vladimir, do të doje të largoheshe?', tha Hoffman.

Gjendja shëndetësore e Putinit ka ngritur dyshime se Rusia së shpejti mund të fitojë një udhëheqës të ri dhe Hoffman tha se janë tre 'lojtarë kyç' që duhen mbajtur nën vëzhgim nëse Putini zëvendësohet.

Në krye të listës për të kapur potencialisht kontrollin e Moskës është Nikolai Patrushev, Shefi i Këshillit të Sigurimit të Putinit, si dhe Alexander Bortnikov, Drejtori i Agjencisë Sekrete të Inteligjencës ruse FSB.

Megjithatë, ndoshta Zëvendësuesi më i mundshëm do të ishte Ministri i Mbrojtjes Sergei Shoigu, një aleat qendror i Putinit, i cili ka pasur një rol shumë të dukshëm në konfliktin e Rusisë në Ukrainë. Një tjetër ish-agjent i CIA-s, Ronald Marks, ra dakord se Rusia mund të vendoset për një udhëheqës të ri dhe tha se nëse Putini rrëzohet, do të ketë kaos pasi Moska goditet nga një luftë masive për pushtet.

“Do të kishte një përleshje të çmendur për disa javë se kush e merr pushtetin,” tha ai për Daily Beast.

Edhe pse ish-agjenti i Inteligjencës tha se Putini deri më tani e ka të sigurt pushtetin ndërkohë që Rusia ka përparësi në disa rajone në Ukrainës.

Nëse lufta fillon të shkojë drejt greminës, presidenti do të bëhej i pambrojtur.

“Rusia po bën fitime tani dhe ata nuk do të tërhiqen. Askush nuk tërhiqet kur ti fiton. Nëse Ukraina me ndonjë mrekulli do të ishte në gjendje t'i shtynte këta njerëz nga Donbasi dhe ta bënte atë poshtëruese për të, unë mendoj se ai është i gatshëm,” shtoi Marks./The Sun 

Ora 07:55
Mbi 180 mln euro vetëm për sigurinë! Çfarë është G7 dhe sa kushton një samit i këtij forumi

Samiti i G7 zhvillohet nga 26-28 qershor nën presidencën gjermane, si kryesuese e radhës së G7-s. Po me çfarë merret ky forum jozyrtar por me kaq peshë?

Kush bën pjesë në G7?

“Grupi Shtatë” përfshin Gjermaninë, Francën, Britaninë e Madhe, Italinë, Japoninë, Kanadanë dhe SHBA-në. Rusia ka qenë pjesë e këtij grupi nga viti 1998 deri më 2014 dhe ky grup asokohe quhej G8. Por Rusia u përjashtua për shkak të aneksimit të Krimesë.

Kur u formua në mesin e viteve 1970, vendet e G7 ishin ekonomitë më të mëdha në botë. Sot ato e përshkruajnë veten si “demokracitë e forta ekonomikisht të botës”, siç tha së fundmi kancelari Olaf Scholz. Një komunitet vlerash, anëtarët e të cilit janë të përkushtuar ndaj lirisë dhe të drejtave të njeriut, demokracisë dhe shtetit të së drejtës, si dhe prosperitetit dhe zhvillimit të qëndrueshëm.

G7 nuk është ndonjë organizatë ndërkombëtare, por një forum jozyrtar. Grupi nuk mund të marrë vendime ligjërisht të detyrueshme, por dakordohet për qëndrime dhe iniciativa të përbashkëta në fusha të ndryshme të politikave. Rezultatet e bisedimeve regjistrohen në deklaratat e përbashkëta të krerëve të shteteve dhe qeverive, të ashtuquajturat komunikata.

Temat e takimeve?

Ndërsa krerët e shteteve dhe qeverive fillimisht donin të flisnin vetëm për çështjet financiare dhe valutore në grupe të vogla, sot pothuajse të gjitha çështjet me rëndësi globale janë në axhendën e G7. Në vitet e fundit, temat kryesore kanë qenë ekonomia botërore, politika e jashtme dhe e sigurisë, zhvillimi dhe migrimi si dhe ndryshimet klimatike.

Përmbajtja e samitit përcakohet nga nikoqiri. Gjermania mban presidencën e G7 gjatë këtij viti. Samiti i radhës zhvillohet në Kështjellën Elmau në Bavarinë jugore dhe ka temën “Përparimet drejt një botë të drejtë”. Fillimisht, ka dominuar tema e luftës kundër ndryshimeve klimatike dhe përshpejtimi i tranzicionit global të energjisë. Por pas agresionit të Rusisë në Ukrainë, klima ka kaluar në plan të dytë. Kancelari Scholz ka ftuar presidentin ukrainas Wolodymyr Selenskyj të marrë pjesë virtualisht në samitin e G7.

Sa shpesh takohet G7?

Ajo që filloi si takime vjetore të G7-ës në grupe të vogla, tani është shndërruar në një bashkëpunim të përhershëm në nivel të ministrave dhe zyrtarëve të lartë të qeverive. Ata koordinojnë qëndrimet kombëtare në mënyrë të vazhdueshme dhe sigurojnë në prag të takimeve ministrore dhe samiteve qëndrimet e palëve për takimet e niveleve më të larta.

Komisioni Evropian ka statusin e vëzhguesit, ndërsa përfaqësuesit më të rëndësishëm të BE-së marrin pjesë në samitet e G7. Vendet në zhvillim janë ftuar shpesh si mysafirë. Në vitin 2022 kanë marrë pjesë Argjentina, India, Indonezia, Senegali dhe Afrika e Jugut në këto takime.

Kritikat ndaj G7?

Popullsia e vendeve të G7 përbën vetëm rreth 10 përqind të popullsisë së botës, por gjeneron rreth 45 përqind të të ardhurave bruto globale. Pra, G7 janë vendet veçanërisht të pasura. Edhe nëse nuk mund të bien dakord për ndonjë rezolutë detyruese, qëndrimet e tyre të formuluara së bashku kanë peshë të konsiderueshme politike. Takimet e G7 gjithmonë hapin rrugën për nisma dhe marrëveshje shumëpalëshe.

Kritika më e madhe është se interesat e tyre dominojnë dhe, mbi të gjitha, se Jugut i kushtohet shumë pak vëmendje. Organizatat e shoqërisë civile kërkojnë rregullisht që G7 të luftojë më intensivisht shkaqet e urisë dhe kërkojnë të ndajë më shumë para për këtë luftë. Në vitin 2015, G7 vendosi si synim eliminimin e urisë për 500 milionë njerëz deri në vitin 2030.

Sa kushton një samit?

Samiti i G7 i këtij viti zhvillohet në Kështjellën Elmau në Bavari, në të njëjtin vend si në vitin 2015, kur Gjermania mbajti për herë të fundit presidencën e G7. Kostot vetëm për sigurinë llogariten në 180 milionë euro. Kjo paguhet nga qeveria federale dhe shteti i Bavarisë./Dw

S.C/G.MO/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Timi: 26/06/2022 17:00

    Keshtu takime te shpeshta benin dhe hitleri me ducen gjate luftes

    Përgjigju
  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

'Doja t'i ngjaja tim eti', Alban Hoxha: Karrierën s'e kam nisur në portë, kam bërë gola

'Doja t'i ngjaja tim eti', Alban Hoxha: Karrierën s'e kam nisur në portë, kam bërë gola