Kurti në '5 pyetje nga Babaramo': Duhen zgjedhje të reja, vendimi i Kushtetueses, i papranueshëm! As taksë, as karantinë për të hyrë në Kosovë

I pyetur në lidhje me marrëdhëniet e acaruar që ka më kryeministrin Rama, Albin Kurti tha se askush nuk ka të drejtë të diskutojë mbi territorin e Kosovës dhe të bëjë pazare me të, as dëshmorët po të ngrihen nga varri. Ai tha se nuk akuzon dot Ramën si të përfshirë drejtpërdrejtë në këtë çështje të shkëmbimit të territoreve me Serbinë, por tha se miqtë e tij në Kosovë duan pikërisht këtë gjë.

"Nuk kam asgjë personale, por mendoj se nuk ka vend të diskutohet për territorin e Kosovës për kufijtë e saj, askush nuk ka të drejtë të flasë për territorin e Kosovës apo bëjë oferta me të për Serbinë madje edhe po u zgjuan dëshmorët nga varret, jo më politikanët e Kosovës apo Shqipërisë. Nuk them se Rama është i përfshirë në këtë, por miqtë e tij më të mirë në Kosovë janë përballë kësaj mënxyre', tha Kurti.

Albin Kurti tha në '5 pyetje nga Babaramo' se Kosova ka dy armiq një të jashtëm që është Serbia që kërkon ndarjen e vendit dhe i brendshmi është korrupsioni dhe krimi në vend. Ai tha se të gjithë shqiptarët duhet të bëhen bashkë dhe të kenë në qëndrim karshi Serbisë.

"Kemi bërë shumë të mira në kaq pak kohë për Kosovës por ajo ka ende dy armiq kryesorë që janë të pranishëm. Një është i jashtëm dhe është Serbia që do ndarjen e Kosovës dhe një armik të brendshëm që kemi korrupsionin e lartë dhe krimin e organizuar. Duhet të bashkohemi kundërt Serbisë dhe për këtë jam përpjekur tërë jetën time që të mos ndajë shqiptarët në skenën politike dhe jo vetëm ata në Kosovë. Bashkimi i shqiptarëve duhet të jetë në një qëndrim të përbashkët karshi Serbisë", tha Kurti.

PDK është një vijë e kuqe për bashkëpunim për Albin Kurtin, i cili tha se kjo është një parti që edhe kur është ë opozitë ka pushtet pasi e ka kapur shtetin në çdo cep të saj.  

"Sa për krahë për krahë më ngadalë pasi bëhet fjalë për një parti që edhe kur del në opozitë nuk mund të jetë jashtë pushtetit pasi shteti i Kosovës vijon të jetë i kapur, PDK për herë të parë me mua ka filluar të ndjejë shijen e opozitarizmit në republikën e Kosovës. Me qeverisjen tonë kjo filloi të ndryshojë  duke pasur parasysh me kohën e shkurtër që ne kemi qeverisur, kemi qëndruar vetëm 51 ditë para se të na rrëzonin qeverinë më të përkrahur të Kosovës me mocionin e marsit", tha Kurti.

Për kryeministrin në detyrë të Kosovës, Albin Kurti zgjedhjet e reja janë e vetmja zgjidhje. I bindur se ka mbështetjen e shumicës së popullit, Kurti thotë se do të fitojë.  

"Kosova sot ka nevojë për zgjedhje të reja. Zgjedhjet janë zgjidhja, më parë sesa ndryshimet brenda situatës aktuale në institucionet e Kosovës. Ne duhet të presim këto ditë në vijim se çfarë do të ndodhë. LVV synon që mbështetjen që ka që është mbi 50% të kurorëzojë në ato zgjedhje. Këto zgjedhje duhen sa më parë në mënyrë që ata që humbën zgjedhjet mos vazhdojnë me keqpërdorim të institucioneve", tha Kurti.  

Për politikanët që ai i quan të 'stërvejtëruar' thotë se disa duhet të shkojnë në burg për korrupsion dhe disa të tjerë duhet të dalin në pension.

"Ka një përpjekje që të ndërtohet një makinë kohore që na kthehen në të kaluar, ky klubi i stërvjetëruar i politikave të korruptuar nuk duan ta kuptojnë qytetarin. Ata janë bërë bashkë sepse ndodhen në perëndimin e karrierave të tyre politike. Disa  prej tyre  për shkak të krimit dhe korrupsionit e kanë vendin në burg ndërsa disa të tjerë duhet të pensionohen ashtu siç ja dha vendimin populli i Kosovës", u shpreh Albin Kurti.

Ndërsa qeveria e Kosovës e hoqi taksën 22 euro për dezinfektimin e kamionëve që hynin nga Shqipëria, kryeministri në detyrë i Kosovës, Albin Kurti i kujton kryeministrit Rama taksën e Rrugës së Kombit, për të cilën thotë se vazhdon të qëndrojë aty. Madje, sipas tij paratë nuk shkojnë për shtetin shqiptar, por për një koncesionar.

Në emisionin "5 pyetje nga Babaramo", Albin Kurti u shpreh se qeveria e Shqipërisë nuk u konsultua me qeverinë e Kosovës as kur i mbylli dhe as kur i hapi kufijtë.

"Ne nuk jemi konsultuar nga qeveria e Shqipërisë kur mbylli kufirin me Kosovën dhe as kur ta hape kufirin. Ne vendosëm mbrëmë që të hapim kufirin me Shqipërinë por me disa masa, që janë të nevojshme meqë pandemia nuk ka kaluar.  Me këtë rast dua të theksoj se ka qenë një vendim i vjetër i njërës prej ministrive, kur shpallën gjendjen e emergjencës që të bëhej dezinfektimi i maunave dhe ky vendim i vjetër është anuluar dhe nuk ka më nevojë për dezinfektimi. Ndërkohë trau vazhdon të jetë aty dhe të na marrë paratë, jo për shtetin, por për një koncesionar", deklaroi Kurti.  

Ndërsa për deklaratën e Presidentit Thaçi se qytetarët shqiptarë duhet të karantinohen për 7 ditë nëse hyjnë në Kosovë, Albin Kurti tha se kjo nuk është e vërtetë.

"Nuk është e vërtetë dhe kjo është humbje kohe të merremi me deklaratat e një presidenti që ka humbur toruan.  Ne e kemi mbyllur karantinimin në fundjavën që lamë pas. Ajo çfarë bëjmë ne është që qytetarët që vijnë në Kosovë i kërkojmë që të tregojnë lejë qëndrimi, i matim temperaturën  e tyre, marrim të dhënat dhe nëse kanë bërë testin 4 ditët e fundit kalojnë pa asnjë problem. Po mundohemi të bëjmë edhe zbutje shtesë. Por nuk mund të sillemi në një situatë normale. Nuk duhet të lejojmë rikthimin e pandemisë", u shpreh Albin Kurti.  

Për arritjen e një marrëveshje me Serbinë, Albin Kurti thotë se beteja vazhdon, por ai shprehet se pazaret me Serbinë nuk do të lejohen.

"Unë si kryeministër në detyrë kam humbur mbështetjen e gjysmës së deputetëve, por është dyfishuar mbështetja popullore. Beteja vazhdon. Ne do të parandalojmë një lloj pazari me Serbinë. Unë besoj që të gjithë ata që po orvaten të bëjnë ujdi me Serbinë, nëse nuk e dinë do ta kuptojnë se po bëjnë pazar pa hanxhi", deklaroi Kurti.   

I pyetur nëse do të ketë protesta qytetare pas vendimit të Gjykatës Kushtetuese, që i hap rrugë qeverisë së re, Albin Kurti tha se këtë nuk e vendos ai, por strukturat e partisë.

"Ne jemi një subjekt politik demokratik që bën diskutime të brendshme dhe i merr vendimet me shumicë. Vendosin organet e subjektit tonë politik, nuk vendos unë, as në cilësinë e kryeministrit në detyrë dhe as në cilësinë e kryetarit të një subjekti politik. Vendos Vetëvendosja që është fituese e zgjedhjeve", tha Kurti.

Çfarë ndodh nëse turma njerëzish rrethojnë godinën e qeverisë dhe nuk ju lenë ju të dilni nga zyra?

"Këto janë pyetje të Shqipërisë. Me të parë me të bërë. Unë nuk dua të vendosem në pozitën e analistit që parashikon të tjerët, por as që fillon të parashikojë situatën e tij në situata hipotetike", u shpreh Albin Kurti.

Kryeministri në detyrë i Kosovës, Albin Kurti në një intervistë për emisionin "5 pyetje nga Babaramo" tha se vendimi i Gjykatës Kushtetuese për të mandatuar Avdullah Hotin, nga Lidhja Demokratike e Kosovës, për formim të qeverisë është anti kushtetuese. Sipas Kurtit, Teksa sulmoi Gjykatën Kushtetuese, tha se gjyqtarët e kësaj gjykate treguan se janë epitoma e kapjes së shtetit.

"Aktigjykimi i Gjykatës Kushtetuese ka anuluar gjykimin e saj të mëhershëm dhe është në kundërshtim me rastet identike që ne kishim në 2010 dhe 2017 kur kishte mocione të suksesshme të mos besimit. Kemi një situatë në të cilën është e vërtetë që  Kosova ka një Gjykatë Kushtetuese, por është lënduar pakthyeshëm kushtetutshmëria dhe vetë kushtetuta. Akti gjykimi i Gjykatës Kushtetuese është shkruar para se të shkruhet dekreti presidencial.  Janë orvatur të gjejnë argumente të paqenë për një dekret presidencial që tenton t'i zërë vendin amendamentit parlamentar të Kushtetutës së Kosovës. Një akt gjykim i tillë është i papranueshëm sepse është në kundërshtim me kushtetutën. Ne kemi një mbledhje të kryesisë nesër dhe këshilltarët do ta trajtojnë akt gjykimin e gjykatës kushtetuese. Jemi në fazën kur më e rëndësishme sesa të parashikohet se çfarë do të bëjë Lëvizja Vetëvendosje, duhet të trajtohet Gjykata Kushtetuese dhe gjyqtarët, të cilët treguan se janë epitoma e kapjes së shtetit të Kosovës. Nuk mund të kemi qeveri të re, legale në këto kushte kur u mbashkuan humbësit dhe duan ta fitojnë në tavolinë dhe nën tavolinë atë që nuk ja dhanë qytetarët vitin e shkuar. ", u shpreh Kurti.