Kishin shkuar për të parë shtëpitë e vjetra, ekzekutohen dy persona në Lezhë! Vritet rapsodi i njohur! Dyshime për konflikte të vjetra pronësie

Dy persona kanë humbur jetën si pasojë e të shtënave me armë zjarri në një zonë kodrinore të thellë të qytetit të Lezhës, një prej të cilëve ishte rapsod i njohur në zonë. Viktimat e identifikuara si Kol Murrani, rapsod i njohur në zonë dhe Preng Simoni, të dy 60 vjeç, të cilët sipas policisë kanë gjurmë të goditjes me armë zjarri në trupin e tyre. Kol Murrani kishte miqësi dhe ishte fqinj me Preng Simonin dhe kishin udhëtuar së bashku drejt zonës së thellë për të parë shtëpitë e vjetra.

Ngjarja e rëndë ka ndodhur në zonën Lalm i Vjetër të Lezhës, një zonë e thellë malore dhe ka mungesë të infrastrukturës rrugore dhe është një zonë që nuk ka lëvizje të mëdha.

Report Tv mëson se dy viktimat kishin udhëtuar në mesditë drejt shtëpive të tyre të vjetra, por humbën kontaktet me familjarët. Dy trupat e pajetë janë gjetur nga djali i njërit prej viktimave, i cili ka dalë t’i kërkojë, pasi asnjëri nuk po përgjigjej në telefon. Viktimat janë gjetur pa shenja jete rreth orës 16:00, ndërsa ekzekutimi i tyre mendohet të jetë kryer rreth mesditës. Sipas burimeve Murrani dhe Simoni banonin në periferi të qytetit të Lezhës dhe  kishin dalë herët në mëngjes me motor për të shkuar tek shtëpitë e vjetra që kanë në këtë fshatin Lalm i vjetër.

Për shkak të terrenit të thyer malor dhe mungesës së infrastrukturës së rrugës, policisë i është dashur 60 minuta për të mbërritur në vendin e ngjarjes.

Sipas burimeve ata janë qëlluar me breshëri automatiku dha nga plagët e marra në disa pjesë të trupit kanë gjetur vdekjen e menjëhershme, ndërsa trupat e tyre janë dërguar në murgun e spitalit të Lezhës për ekspertizë mjeko ligjore.

Në zonën ku janë gjetur viktimat nuk ka asnjë banor, ndërsa janë gjetur gjithashtu një sasi e madhe gëzhojash. Mbetet ende mister se kush është autori dhe motivet, por sipas policisë dyshohet se një person i tretë ka qenë autori që ka kryer ekzekutimin.

Nuk dihet ende nëse njëri prej tyre ka qenë objektivi apo të dy, por për shkak të mungesës së banorëve në zonë zbardhja e ngjarjes do të jetë edhe më e vështirë.

Dy personat e ekzekutuar nuk kanë asnjë precedent penal apo konflikte sipas policisë së Lezhës dhe të dy jetonin në një tjetër fshat. Mbetet ende i paqartë se cili mund të kishte qenë objektiv i këtij atentati.

Policia ka nisur hetimet për zbardhjen e plotë të dinamikës së ngjarjes. Janë shoqëruar disa persona që mund të kenë dijeni lidhur me ngjarjen, ndërsa grupi hetimor ndodhet në vendngjarje dhe vijon punën për të përcaktuar shkakun e rrethanat e ngjarjes.  Policia ka ngritur pika kontrolli dhe po kreh të gjithë zonën ku ka ndodhur ngjarje me qëllim identifikimin dhe kapjen e autorit apo autorëve, pasi ende nuk është e qartë se sa persona kanë qenë në ekzekutim.

Dy Viktimat Kol Murrani dhe Preng Simoni

 

Rendit zhvillimet sipas orarit:

Të Fundit Të Parat

TAG:
• Lezhe
• viktima