U fut për tu larë në det me shokët, mbytet 31-vjeçari tek Currilat! I moshuari humb jetën tek Kavalishenca (VIDEO)

Dy persona janë mbytur në det brenda 24 orëve në Durrës.

Herët në mëngjes u gjet trupi i pajetë i 31-vjeçarit Doland Molla, nga Skrapari, i cili u zhduk ditën e djeshme në plazhin e Currilave në Durrës. Ashtu siç edhe dyshonte policia ditën e djeshme, 31-vjeçari është gjetur i mbytur në det.

Kanë qenë shokët e tij të cilët kanë njoftuar fillimisht rojën bregdetare për zhdukjen e të riut. Sipas rojeve disa të rinj kishin njoftuar se pasi ishin futur në det për tu larë me të, Doland Molla nuk u pa më.

Kjo ngriti dyshimet se i riu ishte mbytur dhe policia njoftoi edhe rojet kufitare për të kërkuar në det të riun. Në dispozicion u vunë disa punonjës të policisë kufitare dhe të policisë së Shtetit të cilët me ndihmën e mjeteve lundruese bënë të mundur gjetjen e trupit të pajetë të 31-vjeçarit.

Ndërkohë më pas, rreth orës 09:30, u gjet i pajetë trupi i 75 vjeçari me inicialet G.H, banues në Tiranë. Ai u gjet i mbytur në bregdetin e Kavalishencës së Ministrisë së Brendshme në zonën e "Plepave" në Durrës, ndërsa sipas policisë, dyshohet se ka pësuar arrest kardiak.

Kujtojmë se ditën e djeshme është zhdukur edhe një 18-vjeçar tek Rana e Hedhun në Shëngjin. Polumbarët e Forcave Speciale dhe familjarët kanë nisur kërkimet për të riun por ende nuk e kanë gjetur.

VIDEO/Kërkimet për 18-vjeçarin e humbur te Rana e Hedhun

Ndërsa po ditën e djeshme në plazhin e Velipojës tre pushues rrezikuan të mbyten në det por fatmirësisht janë shpëtuar nga pushuesit e tjerë.

TAG:
• Durres
• policia e shtetit
• rojet bregdetare
• currila
• mbytet pushuesi