U rizgjodh kryetare e LSI, Kryemadhi falenderon anëtarët: Pjesëmarrja në zgjedhje një sfidë e fituar! Do t'u ofrojmë shqiptarëve shpresën (VIDEO)

Pasi u rizgjodh kryetare e LSI, Monika Kryemadhi, teksa e ka quajtur pjesmarrjen në zgjedhje për delegatët e Konventës Kombëtare dhe Kryetarin e LSI, një sfidë të fituar, ajo sot ka mbajtur një konferencë me anë të së cilës ka falenderuar të gjithë anëtarët e partisë që e kanë votuar.

Gjatë fjalës falenderuese ajo ka deklaruar se prej kohës kur mori në drejtim partinë u përball me shumë sfida, të cilat tha se i kaloi me sukses. Sërish sot Kryemadhi premtoi se do të vazhdojë ta bëjë LSI-në një parti më të fortë dhe me dyert e hapura për të gjithë shqiptarët, dhe se do të sjellë shpresën për qytetarët, duke larguar qeverinë Rama, të cilën e quan "pseudorilindase".

"Nuk gjej dot fjalë që t’iu shpreh nderimin dhe mirënjohjen që kam për të gjithë, por me zemër dua t’iu them. Dua t’iu falënderoj për gjithë përkushtimin, për gjithë vendosmërinë dhe rezistencën, për qëndresën shembullore, por edhe për të gjithë respektin dhe dashurinë që ju më falët në zgjedhjet e 21 nëntorit, të ditës së shtunë, me një anëtar një votë, në Lëvizjen Socialiste për Integrim. Pjesëmarrja juaj në zgjedhje ishte një manifestim i shkëlqyer solidariteti dhe besimi. Pjesëmarrja juaj në zgjedhje është një mesazh përgjegjësie dhe angazhimi. Pjesëmarrja juaj në zgjedhje është tashmë një sfidë e fituar, së pari me vetveten në një proces rindërtimi e vetëpastrimi, çka më bën mua sot, kryetaren më të nderuar, sepse kam nderin që të kem në krah njerëz të ndershëm, jo vetëm në partinë tonë, por njerëz që punojnë më përkushtim dhe e duan vendin e tyre. Ndaj ndjej detyrim dhe mirënjohje për të gjithë ju. Prandaj dua me dorë në zemër edhe njëherë të them FALEMINDERIT LSI! Sot është vetëm fillimi. Ne jemi të vetëdijshëm për vështirësitë e mëdha që na presin, por ne jemi mësuar tashmë me vështirësitë, sepse ato kanë qenë sfida jonë, sepse ne prandaj jemi bashkë që të fitojmë mbi të gjitha sfidat që i kanë dalë përpara LSI-së. Dhe që të fitojmë mbi vështirësitë, ne duhet t'u ofrojmë shqiptarëve shpresën, atë shpresë që u mungon, atë shpresë e cila i është grabitur dhe vrarë nga qeveria pseudo rilindase.  Ne do të bëjmë të mundur që çdo shqiptar të ndjehet ë Shqipëri si në shtëpinë e tij", tha Kryemadhi.

LEXO EDHE:
‘Spastrime’ në PL, Mehmetaj: Përmirësojmë gabimet e së shkuarës! Krisje mes Metës e Kryemadhit? Të mos kalojmë te thashethemet

Të qenurit një grua drejtuese e një partie politike, Kryemadhin e bën dhe më shumë krenare, dhe këtu u ndal duke dhënë mesazhe në mbështetje të figurës.

"Unë sot jam shumë krenare për të gjithë ju, sepse më bëtë mua një grua e cila është drejtuese e një partie politike. Unë dua të dëshmoj se gratë jo mund, por dinë të drejtojnë dhe dinë të përballen me sfidat dhe vështirësitë që kalon çdo lider politik. Gratë i njohin betejat me të cilat përballen familjet e tyre çdo ditë dhe në një mënyrë më të plotë se kushdo tjetër. Gratë dinë të udhëheqin familjet e tyre, dinë të edukojnë fëmijët e tyre. Ato ditë të jenë edhe udhëheqëse të zonja, prandaj është e nevojshme që të kemi sa më shumë gra dhe vajza në politikë, në mënyrë të tillë që ato të jenë drejtuese për t’u përballur me sfidat dhe për të zgjidhur problemet që u kanë dalë shqiptarëve sot, në këto kushte mjaft të vështira.

Ne u krijojmë mundësi të rejave dhe të rinjve tanë. Ne u krijojmë shkollim të mirë dhe cilësor, në mënyrë të tillë që ata të gjejnë një vend pune të mirëpaguar, një vend pune në tregun e punës, në të cilin paguhen si të gjithë bashkëmoshatarët e tyre europianë. Ne u krijojmë mundësi të gjithë qytetarëve shqiptarë për të qenë qytetarë dinjitozë në shtëpinë e tyre që është Shqipëria, si çdo qytetar europian.

Unë e mora drejtimin e LSI-së në një kohë mjaft të vështirë për të, kur sapo kishim dalë në opozitë. Na është dashur të përballojmë sfida e vështirësi të mëdha. Por falë mbështetjes tuaj, falë angazhimit tuaj, ne ia dolëm. Ia dolëm duke fituar sfidën e parë me veten tonë", tha ajo.

Silva Caka, Kryetarja e Komisionit të Zgjedhjeve në LSI, dje tha se Kryemadhi u konfirmua me 42 807 vota pro nga 44 413 vota që ishin gjithsej, duke marrë kështu me 96.3% mandatin e dytë në krye të kësaj partie. Sipas Cakës votat kundër Kryemadhit ishin 1302, ndërsa 304 vota rezultuan të pavlefshme.

Në zgjedhjet morën pjesë 44.413 anëtarë ose 80.7% e anëtarësisë. Votimet ishin online dhe në qendra votimi duke, ku shifrat e dhëna nga Silva Cakës referojnë se 28.285 anëtarë të LSI votuan fizikisht dhe mbi 16.128 anëtarë votuan online.

/K.T./Shqiptarja.com

TAG:
• LSI
• PS
• monika kryemadhi
• grate
• zgjedhjet parlamentare 2021