Negociatat/ Oketa: Macron bën politikë, por fajin e ka Rama, do të ketë protesta! Ish-kreu i Legalitetit: Franca mbështeti Shqipërinë

Ish-kryetari i Partisë së Lëvizjes së Legalitetit, Sulejman Gjana në një lidhje nga Brukseli për emisionin 'Pa Protokoll' tha se Franca i bëri nderë Edi Ramës, që nuk e ndau Shqipërinë nga Maqedonia për vendimin, pasi sipas tij për Shkupin nuk kishte kritika të forta.

"Personi më i lumtur sot duhet të jetë Rama, pasi Franca e mbështeti. Brenda BE-së nuk ka ekzistuar unanimitet për zgjerimin. Franca arriti që të bashkojë qëndrimin e BE-së lidhur me Shqipërinë dhe Maqedoninë, pasi për këtë të fundit sot do të ishin hapur negociatat. E konsideroj qëndrimin francez si mbështetje ndaj kryeministrit shqiptar pavarësisht arsyeve të brendshme që mund të ketë Franca apo reformimit të BE-së. Për Maqedoninë asnjë shtet nuk kishte rezerva. Franca i dha një ndihmë, mbështetje direkte apo indirekte kryeministrit shqiptar" tha ai.

Ish-ministri socialist Marko Bello thotë se ne e duam Europën vetëm kur na intereson. "Shqiptarët e dinë kush është fajtori. Edhe shumica edhe opozita nuk realizuan dialogun politik, jemi shumë larg. Duhet t'i jemi mirënjohës Europës edhe kaq sa na duron.  Ne e duam Europën vetëm kur na intereson ne. Nuk kapet asnjë peshkaqen këtu, presim ta bëjë Amerika me SPAK-un. Qeveria ka përgjegjësinë kryesore. Franca ka edhe problemet e veta të brendshme" tha ai.

Për Gazment Oketën fajtori kryesor për mos hapjen e negociatave është Edi Rama, që sipas tij duhet që të mbajë përgjegjësi. "Deklarimet e Macron duhen marrë si politike, por jo të kërkohet faji te ata. Përgjegjësia kryesore duhet kërkuar brenda Shqipërisë dhe aktori kryesor apo përgjegjësi kryesor është një dhe i vetëm kryeministri i Shqipërisë, që është edhe ministër i Jashtëm, që është dështim i dyfishtë. Në konferencë nuk e dëgjova të thoshte ndonjë fjalë zv/ ministri i Jashtëm. Një vend që aspiron në BE nuk gjykoj se kryeministri mund të dalë dhe të thotë nesër dielli do të lindë prapë është njëlloj sikur të thotë ngrohuni në diell, unë prisja që të dilte të merrte ca përgjegjësi" tha ai.