Vlorë/ Lihet në burg i dënuari përjetë në Greqi, punonte si polic privat, dëshmia: Nuk e dija që isha në kërkim

VLORË- Gjykata e Vlorës vendosi gjatë paradites së kësaj të enjteje ligjshmërinë e masës së sigurisë 'arrest me burg' për Bardhosh Mino (Lytaj), 47 vjeç i cili u arrestua dy ditë më parë, pasi ishte i shpallur në kërkim për një sërë veprash kriminale.

Ndaj Bardhosh Minos rëndojnë disa akuzash, ndërsa është dënuar me burgim te përjetshëm në Greqi për vrasjen e dy turisteve anglezë, ngjarje kjo e ndodhur më 1998. Ai gjithashtu akuzohet edhe për trafikim kanabisi e arratisje nga burgu grek.

Seanca është zhvilluar me dyer të mbyllura pa praninë e medias në sallë. Burime për Report Tv bëjnë me dije se Mino gjatë marrjes në pyetje ka shfaqur shenja nervozizmi ndërkohë që ka deklaruar se nuk dinte se ishte i shpallur në kërkim.

Ndërsa është shprehur: "Kam kryer burg në Greqi. Nuk e dija që isha në kërkim. Jam martuar, madje jam edhe me fëmijë."

Ndërkohë mësohet se edhe pse ishte në kërkim prej gati tre vitesh ai punonte si polic privat. Seanca gjyqësore është drejtuar nga gjyqtare Herila Cela ndërsa prokuror i çështjes ishte Saimir Smaka.

/b.ha./Shqiptarja.com

TAG:
• Vlore
• gjykata e vlores
• bardhosh mino