Zhgënjejnë Shqipëria e Kosova/ Franca, Turqia, Anglia e Çekia në Europian

Nuk ka rekord pikësh të paktën pas ndeshjes me Andorra-n. Shqipëria zhgënjeu ndaj modestëve në “Elbasan Arena” duke barazuar 2-2 dhe ngjitet në kuotën e 13 pikëve në grupin H. Me mendjen tek sfida e së dielës ndaj kampionëve të Botës Francës dhe me shumë të rinj në formacion kuqezinjve nuk u mjaftuan golat e Balajt e Manajt për të mposhtur Andorran.
Rivalët e së dielës transalpinët e Deschamps fituan me përmbysje në Paris ndaj Moldavisë 2-1. Miqtë kaluan në avantazh por francezët arritën të sigurojnë tre pikët falë golave të Varane dhe Giroud me penallti.

Franca vjen në Tiranë si e kualifikuar dhe kryesuese e grupit me 22 pikë. Kualifikimin e siguroi edhe Turqia së cilës i mjaftoi barazimi pa gola ndaj Islandës në Stamboll.
Kosova në “Euro 2020” të paktën nga fushata kualifikuese nuk mund të shkojë. Dardanët u mposhtën  në Plzen nga Republika Çeke 2-1 dhe matematikisht mbeten jashtë. Nuhiu krijoi iluzionin e një kualifikimi historik por çekët e përmbysën rezultatin falë golave të Kral e Celutska. Çekia është në Europian.

Anglia i shënoi 7 herë Malit të Zi për të prerë biletën që përpara se të udhëtojë në Prishtinë. 7-0 fituan “tre luanët” ku spikati me tregolësh sulmuesi Harri Kane.
Tregolëshin e 55-të në karrierë realizoi Cristiano Ronaldo në fitoren 6-0 të Portugalisë ndaj Lituanisë që i afron edhe më shumë luzitanët me Euro 2020./ Përgatiti Andi Kapxhiu

TAG:
• kosova
• kosova
• kosova
• shqiperia
• Franca
• euro 2020