Gjatë këtij mësimi trajtohen emrat e përbërë nga dy tema fjalëformuese, njëra prej të cilave është “vend” dhe vendoset në krye të fjalës së re. Bazuar në pyetjen e një ndjekësesje, mësuese Anjeza shpjegon se si duhet shkruar emri jokonkret “vendndodhje”. Në të shumtën e rasteve kjo fjalë shkruhet “vendodhje” duke gabuar temën e parë fjalëformuese. Shembuj të tjerë fjalësh me të njëjtën temë nistore janë “vendngjarje”, “vendtakim”, “vendpushim”, etj. Siç shihet tema “vend” shkruhet e plotë. Së dyti, mësuese Anjeza saktëson përdorimin e foljeve kalimtare dhe jokalimtare dhe si shembull ka marrë foljet “thyej” dhe “thyhem”, të cilat duket se nuk gjejnë një përdorim të saktë te folësit dhe shkruesit e shqipes. Si fjalë e huaj për sot është zgjedhur “spostoj”, që në shqipe, si për nga kuptimi, si për nga struktura fjalëformuese është e barazvlefshme me “zhvendos”.