TIRANE-Vijojnë punimet për ndërtimin e stadiumit kombëtar të futbollit ‘Arena Kombëtare’. Në videon e fundit të publikuar nga Federata Shqiptare e Futbollit duket se stadiumi ka marrë formë dhe punimet janë drejt përfundimit. Konstruksioni i betonit, ai metalik dhe tribunat thuajse janë mbaruar. Sipas ritmeve parashikohet që në mesin e vitit tjetër të 2019 gjithçka mund të jetë gati për të prerë shiritin e përurimit.
Arena Kombëtare do të ketë 22 mijë vende. Tribunat e stadiumit do të jenë të gjitha të mbuluara. Kompleksi i ri, me një sipërfaqe prej 43.000 metrash katror (nga të cilët 25.000 metra katror do të shërbejnë për stadiumin, 10.000 metra katror për zyrat dhe 8.000 metra katror për dyqane), është konceptuar si një strukturë e përbërë, ndërsa do të kushtojë 50 milionë euro dhe është ndërtuar me PPP, Partneritet Publik Privat. Pas ‘Elbasan Arenës’ dhe Loro Boricit’, stadiumi ‘Arena Kombëtare’ është impianti i tretë modern ku do të luajë ekipi kombëtar dhe jo vetëm.
