ELBASAN-Mbrëmjen e sotme ka shpërthyer në flakë duke u djegur pjesërisht makina e shefit të policisë në paraburgimin e Bradasheshit, Krenar Kasi. Report Tv sjell pamjet në flakë të makinës tip 'Benz ML' me targë AA 131 IX, që ka qenë e parkuar 100 metra nga drejtoria e policisë së Elbasanit, pranë ish-gjykatës kur u dogj.
Sipas policisë nga hetimi paraprak dyshohet se zjarri është aksidental, por gazetari i Report Tv, Aldo Kozarja raporton se djegia e makinës dyshohet se ka qenë e qëllimshme për shkak të detyrës, edhe pse nuk ka pasur probleme apo konflikte.
Krenar Kasi disa vite më parë ka qenë shefi i sektorit të narkotikëve në drejtorinë e policisë së Elbasanit, më pas shef i policisë në burgun e Peqinit dhe së fundmi, shef i policisë në paraburgimin e Bradasheshit në Elbasan. Policia ka nisur hetimet për ngjarjen e sotme.
