Godina që dikur ka shërbyer si materniteti i Korçës ka përfunduar restaurimin dhe tashmë do të shërbejë si administrata e Polit të Dijes në Korçë. Lajmi është ndarë nga kryeministri Edi Rama përmes rrjeteve sociale.

“Mirëmëngjes, dhe me rilindjen e godinës historike të dikur maternitetit të Korçës, ndërtuar si dhuratë e të pavdekshmit Thoma Turtulli për qytetin e tij, e cila u shpëtua nga asgjësimi e do të shërbejë plot hir si qendra administrative e Polit të ri të Dijes, ju uroj një javë të mbarë”, shkruan Rama.

Poli i Dijes është kampusi i ri universitar ku veç godinave të ish-Sanatoriumit është konservuar dhe restauruar vetëm kjo ndërtesë e dhuruar nga Thoma Turtulli. Do të ketë edhe një godinë të re 6-katëshe, hapësira për auditorë, laboratorë, bibliotekë e gjithçka nevojitet për një kampus universitar.  Ndërtimi financohet nga Fondi Shqiptar i Zhvillimit.