Të mos qendrosh në radhë! Të përdorësh në dobinë tënde kohën që harxhohet duke pritur për të bërë një veprim bankar! Kjo ka qenë një ëndërr e përjetshme e të gjithë njerëzve, që shpesh e kanë gjetur veten të bllokuar me orë të tëra nëpër sportele. Koha është flori, thotë një proverbë e të gjitha kombeve të botës. Dhe është vërtet kështu: sipas një studimi të përbashkët të Bankës Botërore dhe Bankës së Shqipërisë, të bërë këtë vit, nga shmangia e pagesave me lekë në dorë nëpër sportelet e bankave në një vit (por duke realizuar të njejtat pagesa nëpërmjet një kompjuteri apo celulari) shqiptarët mund të përfitojnë, jo pak, por 110 milionë euro! Shifër e barabartë kjo, me 0.9% të Prodhimit të Brendshëm Bruto të vendit.
