Report Tv siguron foto nga kamerat e sigurisë brenda garazhit të kompleksit "Golden" në pronësi të ALtin Hajrit në Shijak, të cilat shfaqin të gjithë dinamikën e asaj që ka ndodhur me sjelljen në kompleks të Jan Prengës. Nga të gjitha hetimet e kryera deri më tani, por edhe nga se çfarë përmbajnë kamerat e sigurisë, 49-vjeçari i rrëmbyer më 17 janar 2020 në Kamëz, është sjellë i pajetë në kompleks me një Range Rover të bardhë, i cili rezulton i vjedhur nga një këngëtare tallavaje në zonën e Komabinatit, me targë të falsifikuar. Rreth orës 12:33, një orë pasi ka ndodhur pengmarrja në Kamëz, pesë persona që janë evidentuar në ambientet e bodrumit të kompleksit "Golden" sapo kanë mbërritur nga pengmarrja. Ata janë të maskuar dhe të armatosur, ndërsa i vetmi që nuk ka maskë, një burrë me bluzë të bardhë, dyshohet të jetë pikërisht Altin Hajri, i shpallur në kërkim nga policia. Ai dyshohet të mos ketë qenë pjesë e grupit të rrëmbyesve, por ka pritur mbërritjen e autorëve bashkë me Jan Prengën në resort. Të gjithë, kanë ndarë rolet dhe kanë bashkëpunuar më tej për të larguar trupin e pajetë të 49-vjeçarit nga kompleksi. Në bodrum shihen tre makina. Njëra është Range Rover, ku nga bagazhi është nxjerrë trupi i pajetë i Jan Prengës. Report Tv publikon vetëm disa foto të shkëputura nga kamerat e sigurisë në "Golden", sepse pamjet e plota filmike, janë realisht të rënda. Autorët, me gjakftohtësi, pasi e nxjerrin nga Range Rover e lënë trupin në tokë, ndërkohë që është gjysmë i zhveshur. Më tej, e fusin në disa qese plastmasi dhe e kalojnë në furgonin e bardhë, tek i cili ka edhe kazma e lopata. Trupi i Jan Prengës ka qëndruar brenda resortit përreth 8 orë, dhe vetëm në 20:30 të darkës, furgoni me trupin e pajetë ka dalë nga kompleksi "Golden" për t'u groposur në një vend ende të paditur nga policia.