THUMANË- Thumana do të jetë zona e parë, nga 26 të tilla ku do të nisë ndërtimi i lagjes së re për banorët e prekur nga tërmeti i 26 nëntorit. Në këtë lagje të re do të të ndërtohet gjithçka nga e para ku do të përfshihen gjithsej 806 banesa individuale dhe 7981 banesa kolektive, jo më të larta se 4 kate! Kreu i qeverisë, Edi Rama ishte sot në Thumanë, bashkë me ministrin e Kulturës Elva Margariti dhe ministrin e rindërtimit, Arben Ahmetaj ku prezantuan planin përpara banorëve. Duke e cilësuar si një përrallë, por që shumë shpejt do të bëhet realitet, Rama tha se Thumana shumë shpejt do të shndërrohet në një zonë turistike, si Puka dhe Belshi. Një lajm i mirë, tha Rama, është se familjet do përfitojnë shtëpi aq sa kurora ka pasur në atë banesë (dy familje brenda një shtëpie, do përfitojnë dy shtëpi). Ajo që është më e rëndësishme është se aty ku është shembur një banesë, nuk do të ngrihet një tjetër e mbi të gjitha aty ku ka pasur viktima do të ngrihet një hapësirë e gjelbër, parku i memories.