Kombëtarja e futbollit ka zbritur në fushë pasditen e së martës për të zhvilluar përgatitjet e dy miqësoreve të marsit. Përveç mungesës së Myrto Uzunit që ende nuk është pjesë e grupit, 25 lojtarët e tjera kanë qenë nën urdhërat e Sylvinhos.

Dje (e hënë) ekipi është bërë bashkë dhe ka zhvilluar stërvitjen e parë, teksa këtë të martë braziliani do ketë mundësinë për të parë formën e lojtarëve. Kuqezinjtë kanë dy miqësore përpara, ajo kundër Kilit të premte në Parma (19:00) dhe kundër Suedisë në Stockholm më 25 mars në orën 21:00.

Duelet vijnë në një kohë kur ekipi ynë është me mendjen për në Gjermani, teksa do jetë pjesë e grupit B të Euro 2024 dhe rivalë do ketë emra si Italia, Spanja apo Kroacia.