Të rinjtë e PD-së dhe LSI-së protestuan sot para parlamentit, teksa po zhvillohej seanca plenare dhe po betoheshin deputetët e rinj nga listat e partive opozitare. Të rinjtë e forumeve kishin marrë me vete nga një palë këpucë, që sipas tyre janë të të rinjve të cilët janë larguar nga vendi, ndërsa pranë tyre vendosën nga një flamur të vendeve të BE-së ku kanë emigruar më së shumti. Por simbolika e këpucëve e përdorur nga të rinjtë e forumeve opozitare nuk ishte origjinale, pasi është përdorur më parë në protesta në Maqedoni po për të larguarit në 2016, por edhe në Francë në 2015 në samitin për klimën në Paris. Zakonisht protestat me simbolikën e këpucëve në botë bëhen për të humburit.