Duket si një pamje e shkëputur nga një nga film aksion, por jo. Kjo është një nga 10 aeroplanmbajtëset e SHBA-së, e cila prej disa ditës është duke u stërvitur në ujërat e detit Adriatik. Ditën e sotme, ministrja e Mbrojtjes, Olta Xhaçka, e shoqëruar nga presidenti Ilir Meta dhe gjeneral Bardhyl Kollçaku, kanë bërë një vizitë në këtë aeroplanmbajtëse.
Ministrja Xhaçka e ka cilësuar vendosjen e aeroplanmbajtëses në Durrës, si një konfirmim i marrëdhënieve të shkëlqyera SHBA- Shqipëri.
"Aeroplanmbajtësja amerikane “Abraham Lincoln" prej ditësh po stërvitet në ujërat e detit Adriatik. Një prej 10 aeroplanmbajtësve të SHBA është njëherësh vendkomanda e Grupit të Nëntë Goditës të Forcave Detare amerikane. Vizita në të, ishte jo vetëm një eksperiencë e bukur, por mbi të gjitha, konfirmim i marrëdhënieve të shkëlqyera që vendi ynë ka me aleatin e tij strategjik, Shtetet e Bashkuara të Amerikës në drejtim të mbrojtjes dhe sigurisë. Faleminderit Ambasadës Amerikanë në Tiranë U.S. Embassy-Tirana për ftesën dhe komandantit të aeroplanmbajtëses, kapiten Brouwne USS Abraham Lincoln MWR për mikpritjen, në stërvitjen më të veçantë pranë brigjeve shqiptare", shkruan Xhaçka.
Disa informacione për aeroplanmbajtësen " Abraham Lincoln"
USS Abraham Lincoln (CVN-72) është një nga 10 aeroplanmbajtëset e SHBA aktualisht në shërbim të Forcave Detare të SHBA. Ajo është e klasit Nimitz me një tonazh rreth 100.000 ton. Ky klas aeroplanmbajtëse sot është anija ushtarake me e madhe dhe më e fuqishme në bote, si dhe tregues i fuqisë ushtarake të SHBA.
USS Abraham Lincoln (CVN-72) është vendkomanda e Grupit të Nëntë Goditës të Forcave Detare të SHBA. Së bashku me kryqëzorët me rraketa të drejtuara dhe nëndetëset, si pjesë përbërëse e grupit, kjo fuqi detare e pakontestueshme i jep mundësinë SHBA të krijojë superioritet detar të mjaftueshëm për të projektuar fuqinë ushtarake të SHBA dhe për të menaxhuar krizat të mbarë globin.
Grupi i Nëntë Goditës të Forcave Detare të SHBA, së bashku me Aeroplanmbajtësen USS Abraham Lincoln (CVN-72) gjendet prej disa ditësh në Adriatikun Jugor, pranë brigjeve shqiptare, për të zhvilluar një stërvitje të planifikuar përpara ridisllokimit të saj në një rajon tjetër operacional.
