Socialistët kanë përgatitur të paktën 10 ndryshime në Kodin Penal duke ashpërsuar dënimin në disa fusha. Por kur opozita ka përshkallëzuar aksionin e saj duke bllokuar rrugët çdo të enjte, mazhoranca propozon që ky veprim të kriminalizohet dhe të dënohet me burg.

Kryeministri Edi Rama gjatë mbledhjes së grupit parlamentar të Partisë Socialiste paralajmëroi ashpërsime të tij, veçanërisht lidhur me sigurinë ushqimore. Ndryshimet e reja parashikojnë masa shtrënguese, 10 vjet burg për ata që do të cënojnë sigurinë ushqimore përmes përdorimit të kimikateve, shitjes së tyre jashtë afateve të skadencës. Por jo vetëm kaq, Rama paralajmëron deri në heqje të të drejtave të ushtrimit të aktiviteve të bizneseve që do tregtojnë mallra jashtë standarteve.