Veliaj: Hedh poshtë akuzat e PD-së, Basha i dha vetes leje për të ndërtuar dhe nuk pagoi as taksën

Vërtetimi për likujdimin e detyrimeve vendore Archimed International

1 / 5

Lejet e firmosura nga Lulzim Basha

2 / 5

Lejet e firmosura nga Lulzim Basha

3 / 5

Lejet e firmosura nga Lulzim Basha

4 / 5

Lejet e firmosura nga Lulzim Basha

5 / 5
21 Dhjetor 2018, 18:16

Këshilli Bashkiak i Tiranës është mbledhur këtë të premte për të diskutuar për buxhetin 2019 dhe kreditë e buta të dhëna nga Bashkia. Këshilltarët bashkiakë të Partisë Demokratike nuk kanë marrë pjesë, ndërsa jashtë ambienteve të Bashkisë së Tiranës janë hasur një grup banorësh të prekur nga projekti "Unaza e Madhe", duke protestuar.

Kryetari i Bashkisë së Tiranës, Erion Veliaj e ka nisur mbledhjen e sotme me denoncimin e Partisë Demokratike, ku deputetja Jorida Tabaku dhe këshilltari ligjor Gazmend Bardhi deklaruan se ai së bashku me kryeministrin Edi Rama po e shfrytëzojnë projektin "Unaza e Madhe" për t'i hapur rrugë ndërtimit të një rezidence luksoze të trafikantit të drogës Edmond Bego. (Lexo këtu) Veliaj i hodhi poshtë këto akuza dhe u shpreh se nëse gjendet qoftë dhe një dokument i vetëm që e vërteton dicka të tillë, ai do të japë dorëheqjen nga posti i kryetarit të Bashkisë së Tiranës.

Më tej, Veliaj zbuloi se Lulzim Basha kur ishte kryetar i bashkisë së kryeqytetit, jo vetëm që i kishte dhënë leje vetes për ndërtimin e një kati të 13-të në pallatin ku banon aktualisht, por nuk ka paguar as taksën e ndërtimit në infrastrukturë.

Shtesë kati në hapësirën e përbashkët të banorëve të pallatit të tij me pamje nga Liqeni. Pë rata që nuk e dinë si duket një leje ndërtimi, po sjell për shembull lejen që Lulzim Basha i dha vetes së vet, që të kuptojnë edhe qytetarët si duket një leje. Kryetari i bashkisë i jep leje vetes së vet që nga kati i 12 të shkojë në kat të 13. Ju e keni parë që Luli kur nuk vinte në Bashki ia delegonte të gjitha Enos, por për këtë leje s’kishte besim, këtë të vetën duhet ta firmoste patjetër vetë. Dhe shiko çfarë thotë leja: Leje zhvillimore ndërtimi për strukturën shtesë 1 kat mbi strukturën 12 kate në pronë të zonjës Aurela Isufi dhe Lulzim Basha. Në vendndodhje Skerdilajd Llagami dhe shoqëria që ndërton Arkimed International. Sipërfaqe e pronës që shtohet 203 m2. Vëllimi që shtohet 323 m3 mbi katin e 12. Më thoni një tjetër njeri që ka marrë dot leje nga kjo bashki të ndërtojë kat të 13 mbi një leje të ezauruar.

Erion Veliaj, Kryetar i Bashkisë së Tiranës

Sipas Veliajt, ish-kreu i Bashkisë së Tiranës nuk ka paguar as taksat e bashkisë. 

Ju do thoni, mirë që i dha leje vetes së vet, po të paktën ka paguar taksën. Vërtetimi i taksave të bashkisë: Vërtetojmë se subjekti e ka likuiduar taksën e ndikimit në infrastrukturë në vlerën 171 820 lekë, por kjo pagesë është rimbursuar nga teprica kreditore e vitit 2013. Pra Tatim-taksat e Tiranës thonë që kemi pasur tepricë nga viti i parë, dhe me lekët e tepricës është paguar taksa e Lulit. S’paguan taksën e bashkisë së vet, e lejes së ndërtimit të vetes së vet. Dhe thotë ja kam marrë firmës nga teprica debitore, për 171 mijë lekë. A ke turp? A ke karakter? A ke fytyrë?.

Erion Veliaj, Kryetar i Bashkisë së Tiranës

Në mbështetje të akuzave të tij, Veliaj publikoi edhe planimetrinë nga lart të katit shtesë që Basha ia 'dhuroi' vetes.

Sikurse e shihni edhe nga kjo planimetri, Basha i ka shtuar vetes katër dhoma shtesë në shkelje flagrante me ligjin. Shikoni pak si është pallati origjinal dhe dua të falënderoj banorët që na e denoncuan se bashkia mund të ruajë territorin në tokë, por se çfarë ndodh në kat të 12 dhe 13 jo vetëm i ka dhënë leje vetes por ka ndërtuar pa leje në katër cepa të ndërtesës në majë. Shikoni pamjen. Katër struktura pa leje. Sigurisht, të hënën i shkon gjoba, vendimi për prishje dhe kallëzimi në prokurori, patjetër. Por nga pamjet me dron skica, pallati ka formë kryq dhe ka shtuar katër dhoma. Njeriu që do të bëhet kryeministri i Shqipërisë ndërton pa leje. E kuptoni pse PD sa gjen një grup pa leje i thotë hajde protestojmë se kryepula do të ruaj vezët e veta.

Erion Veliaj, Kryetar i Bashkisë së Tiranës