1 vit nga 'Charlie Hebdo', përkujtohen
viktimat me këngë e vargje të Hygosë

Francezët kanë kujtuar sërish viktimat e sulmeve terroriste në revistën satirike "Charlie Hebdo" dhe në një supermarket hebre, të ndodhura një vit më parë.

Presidenti francez Fransua Hollande vendosi një kurorë në sheshin e Republikës në kryeqytetin francez, i shndërruar ne simbol te solidaritetit.
 
Të gjithë të pranishmit në këtë ceremoni mbajtën një minutë heshtje në nder të 17 viktimave të dy sulmeve. 

I shoqëruar nga kryebashkiakja e Parisit, An Hidalgo, shefi i Elisezë zbuloi një pllakatë në nderim te viktimave te janarit, por edhe te sulmeve te nëntorit.



Këngëtari francez Xhoni Hollidei këndoi për të pranishmit këngën “Një e diel janari”, duke kujtuar marshimin e 1,6 milionë njerëzve në Paris pas masakrave të vitit të kaluar. Gjatë ceremonisë u recituan edhe pjesë te shkrimtarit Viktor Hygo.

Franca është ende nën një gjendje të jashtëzakonshme pas sulmeve të 13 nëntorit në Paris, në të cilën persona të armatosur të lidhura me Shtetin Islamik vranë 130 njerëz. 

Ndërkohë xhamitë në kryeqytetin francez kanë hapur dyert edhe për besimtarët jo myslimanë, në përpjekje për të kapërcyer paragjykimet kundër Islamit.

Redaksia Online
Gre.M/Shqiptarja.com