1 vit nga lufta në Ukrainë, Xhaçka në Këshillin e Sigurimit në OKB: Bota po vuan pasojat e agresionit rus, lufta duhet të marrë fund

Sot në 1-vjetorin e agresionit rus në Ukrainë, ministrja e Jashtme Olta Xhaçka ka mbajtur një fjalim në Këshillin e Sigurimit të OKB-së, në takimin mbi Ruajtjen e paqes dhe sigurisë së Ukrainës.

Në fjalën e saj ministrja e Jashtme, tha se agresioni rus në Ukrainë ka shkaktuar një dëm të pamatshëm. Sipas ministres mijëra civilë kanë humbur jetën dhe se miliona në mbarë botën, sidomos më të varfrit dhe shtresat më të prekura, kanë vuajtur shumë për shkak të efekteve globale të luftës, veçanërisht të rritjes së krizës ushqimore.

Në Xhaçkës, Rusia me veprimet e saj të gabuara, me politikën e saj katastrofike dhe me luftën e saj kriminale, Rusia është izoluar dhe faji bie vetëm mbi të për këtë izolim. Ministrja bëri thirrje që të gjithë të punojmë për paqen, ndërsa shtoi se Ukraina meriton mbështetjen dhe solidaritetin tonë ekonomik, politik dhe ushtarak në rezistencën e tyre heroike

Fjala e plotë e Xhaçkës

Zoti President,

Më lejoni të filloj duke falënderuar Maltën për organizimin e këtij takimi dhe ju Ministër për kryesimin e tij. Ne i jemi mirënjohës Sekretarit të Përgjithshëm për fjalët e tij të fuqishme, por edhe për përpjekjet e vazhdueshme për t'i dhënë fund luftës në Ukrainë dhe mbi të gjitha për qartësinë e tij morale gjatë kësaj krize të paprecedentë.

Kolegë, Sot është një përvjetor tragjik.

Kjo ditë nuk ka asgjë për të festuar, përkundrazi është një ditë pendese. Gjithsesi një gjë duhet të theksojmë dhe të mos harrojmë kurrë: nga një luftë katastrofike dhe pasojat e saj të tmerrshme, ne kemi parë botën jashtëzakonisht të bashkuar për të dënuar një luftë që erdhi nga zgjedhja, për të refuzuar aneksimin territorial me forcë, për të respektuar ligjin ndërkombëtar, dhe për të mbrojtur Kartën e OKB-së.Sërish dje, 141 Shtete Anëtare nga të gjitha anët e botës, konfirmuan njëzëri se ata nuk duan një botë sipas Rusisë, por një botë sipas Kartës së OKB-së; se ata duan paqe, një paqe të drejtë për Ukrainën dhe popullin e saj.

Kolegë,

Një vit më parë, trupat ruse u vërsulën drejt kufijve të Ukrainës dhe raketat ruse mbushën qiellin e saj duke ndezur luftën brutale që vazhdon deri në këtë orë. Ajo që Rusia filloi pikërisht në këtë ditë të vitit të kaluar ka qenë katastrofike për Ukrainën, ka tundur themelet e Evropës, ka formësuar historinë botërore.

Mijëra civilë kanë humbur jetën; miliona fëmijë kanë humbur shkollat e tyre; njerëz të panumërt kanë humbur shtëpitë e tyre; miliona të tjerë janë zhvendosur dhe dëmet në infrastrukturën dhe ekonominë e Ukrainës janë të pamatshme. Miliona në mbarë botën, sidomos më të varfrit dhe shtresat më të prekura, kanë vuajtur shumë për shkak të efekteve globale të luftës, veçanërisht të rritjes së krizës ushqimore.

Gjatë gjithë vitit, bota ka qenë dëshmitare e ngjarjeve, ka verifikuar dhe dokumentuar krime të neveritshme, ekzekutime, përdhunime, plaçkitje, tortura, dëbime të fëmijëve, krime lufte dhe krime kundër njerëzimit të kryera nga pushtuesi.

Ne kemi qenë dëshmitarë të mijëra të dënuarve që u detyruan të mobilizohen dhe u sakrifikuan në radhët e grupit Ëagner, një makinë vrasëse me gjurmë famëkeqe dhe në pjesë të tjera të botës. Dhe më e tmerrshmja nga të gjitha është se një luftë e padrejtë, e paligjshme dhe e paprovokuar kundër një vendi dhe populli të pafajshëm, kryhet nga një anëtar i përhershëm i këtij Këshilli, i cili ka përgjegjësi të veçantë për garantimin e paqes dhe sigurisë, për zbatimin e Kartës së OKB-së dhe të drejtës ndërkombëtare.

Në vend të kësaj, ajo ka zgjedhur të sillet si shtet që nuk njeh rendin ndërkombëtar, duke shkuar kundër ligjit, kundër rregullave, kundër botës. E vërteta është se pavarësisht gjithçkaje, Ukraina është ende këtu, populli i saj është duke vuajtur, por duke luftuar, duke rezistuar në mbrojtjen e tokës, lirisë, dhe të ardhmes së tyre. Por ata nuk janë vetëm. Lufta e tyre është edhe lufta e kujtdo që aspiron paqen.

Zoti President,

Udhëheqësit rusë kanë dëshirë të flasin për historinë dhe rolin e vendit të tyre në të. Dhe Rusia sigurisht që ka shumë arsye për të qenë krenare për historinë e saj. Por mbi të gjitha shtetet dhe liderët e tyre gjykohen nga aftësia për të mësuar nga e kaluara dhe për veprimet e tyre në të tashmen. Dhe aktualisht, Rusia nuk ka asnjë arsye për të qenë krenare. Me veprimet e saj të gabuara, me politikën e saj katastrofike dhe me luftën e saj kriminale, Rusia është izoluar dhe faji bie vetëm mbi të për këtë izolim. Sa më shpejt ta kuptojnë rusët e zakonshëm, aq më shpejt do të ndalet kjo marrëzi.

Kolegë,

Kjo luftë duhet të marrë fund dhe do të marrë fund. Por fundi që ne parashikojmë është fundi i agresionit, jo fundi i rendit botëror të bazuar në rregulla. Është fundi i pranisë së trupave ruse në Ukrainë, jo fundi i jetës atje; Është fundi i vuajtjeve të panevojshme, jo fundi i shpresës.

Ukraina duhet të ketë dhe do të ketë një të ardhme me një paqe të drejtë dhe të qëndrueshme, të lirë, të sigurt, sovrane dhe brenda integritetit të saj territorial të rivendosur, dhe ne presim me padurim ditën, që shpresoj të jetë së shpejti, të fillimit të një procesi shërimi dhe pajtimi. Por derisa të vijë ajo ditë, Ukraina dhe populli i saj meritojnë të gjithë mbështetjen tonë politike, ekonomike dhe ushtarake, të gjithë solidaritetin tonë në rezistencën e tyre heroike për të mbrojtur veten, për të mbrojtur të drejtën.

Slava Ukraini.

Faleminderit

 

 

M.Q./r.k./Shqiptarja.com

TAG:
• rusia sulmon ukrainen
• lufta ne ukraine
• Këshilli i Sigurimit i OKB
• OKB
• ministria e mbrojtjes
• olta xhaçka