Zyra e Komisionerit për të Drejtën e Informimit dhe Mbrojtjen e të Dhënave Personale bën 10 vjet që nga dita e krijimit. Komisioneri Besnik Dervishi tha se për herë të parë Shqipëria ka vendime të komisionerit për çështje që lidhen me transparencën publike.

“Gjatë kësaj periudhe është arritur që të kemi një legjislacion të plotë konform stamdarteve të Bashkimit Europian në të dy fushat e veprimtarisë sonë. Për herë të parë kemi vendime të komisionerit për çështje që lidhen me transparencën e autoriteteve publike, të cilat po ndryshojnë një mënyrë pune të kultivuar thellë, ku çdo akt i tyre nuk mund të ishte publik. Një akt i institucionit publik duhet të jetë patjetër transparent”, tha Besnik Dervishi. 

Zyra e Komisionerit për të Drejtën e Informimit dhe Mbrojtjen e të Dhënave Personale organizoi sot një takim me rastin e 10-vjetorit të themelimit të saj. Z. Besnik Dervishi në fjalën e tij përshëndetëse, përshkroi rrugëtimin e Zyrës së Komisionerit, duke theksuar sfidat dhe arritjet në këta 10 vjet.

Në këtë aktivitet u nënshkrua marrëveshja e bashkëpunimit mes Institucionit të Avokatit të Popullit dhe Zyrës së Komisionerit. Në qendër të veprimtarisë së tyre, këto institucione kanë garantimin e lirive dhe të drejtave themelore të njeriut.

Kjo marrëveshje mundëson koordinimin më të mirë të punës mes dy institucioneve, si një detyrë e lënë nga Kuvendi i Republikës së Shqipërisë, me fokus të veçantë, fushën e të drejtës për informim.

Gjithashtu, marrëveshja parashikon bashkëpunimin e palëve për zbatimin e projekteve të përbashkëta, si dhe shkëmbimin e eksperiencës dhe praktikave më të mira.

Redaksia Online
l.q/Shqiptarja.com