Me rastin e 100 vjetorit të marrëdhënieve Holandë – Shqipëri, në qytetin e Durrësit do të zhvillohet një ceremoni përkujtimore të dielën, në orën 10:00.
Kjo ceremoni do të mbahet edhe në nder të Kolonel Lodeëijk Thomson dhe 100 vjetorit të Misionit të Parë Paqeruajtës në Shqipëri.
Sipas zyrës së shtypit të Ambasadës holandeze në Tiranë, me kërkesë të komunitetit ndërkombëtar, Mbretëresha Wilhelmina e Holandës caktoi përmes një dekreti të 24 shkurtit 1914, pesëmbëdhjetë oficerë të cilët do të shërbenin për Xhandarmërinë Shqiptare, duke ju dhënë kështu një rang të lartë ushtarak. Kjo trupë do të përbënte Misionin Ushtarak Holandez si një Mision Paqeruajtës në Shqipëri dhe i pari i këtij lloji në Europë.
Pikërisht 100 vjet më parë, në betejën e 15 Qershorit 1914, Kolonel Thomsoni mbeti i vrarë së bashku me 40 kapitenë dhe ushtarë shqiptarë. Shkrimtari i famshëm dhe diplomati i asaj kohe, Faik Konica, e quajti Thomsonin në funeralin e tij “një hero, një mbrojtës sypatrembur i Shqipërisë dhe një martir i lirisë”.
Në vitin 2003, një kopje e bronztë e monumentit të Thomsonit mbërriti në Shqipëri nga Grongingeni dhe u vendos në rrugën e quajtur “Thomson” në Durrës, ku ai është shpallur edhe si “Qytetar nderi” që nga viti 2000.
Në nder dhe respekt të Misonit Ushtarak Holandez dhe të shquarit Kolonel Thomson, Kryetari i Bashkisë së Durrësit, Vangjush Dako, Prefekti i Durrësit, Kryetari i Keshillit të Qarkut, Ambasadori i Mbretërisë së Holandës Martin De la Beij, Shoqata Miqtë e Thomsonit dhe të tjerë përfaqësues të pushtetit qëndror dhe vendor do të bëjnë homazhe tek monumenti i Kolonel Thomsonit – duke nderuar kështu misionin hollandez për kontributin e shquar dhe aktivizmin e tyre në stabilizimin e paqes dhe rendit në Shqipëri/ATSH/
