102-vjet kryeqytet, Admirina Peçi sjell dokumentarin “Tirona e zotnive të papërkulur”! Si u tortuan në diktaturë “etërit” e kryeqytetit! Gazetarja: Disa prej viktimave nuk u dihen varret

Në kuadër të 102-vjetorit të Tiranës kryeqytet, gazetarja Admirina Peçi  sjell në kinema “Millenium” dokumentarin “Tirona e zotnive të papërkulun”. Personalitete të Tiranës e një shekulli më parë, fakte të panjohura dhe rrëfime ekskluzive të trashëgimtarëve, që tregojnë shkëlqimin e një kryeqyteti e më tej krimet makabre të komunizmit ndaj atyre që vunë gurëthemelet për një jetë dinjitoze

Gazetarja Admirina Peci shpalos  Tiranën,në zanafillën e saj si kryeqytet dhe figurat që i dhanë shkëlqimin.

Në kuadër të 102-vjetorit të Tiranës kryeqytet, gazetarja udhëton një shekull pas në kohë. Me dokumentarin “Tirona e zotnive të papërkulun” zbulon kryeqytetin në vitet 1920-1944, e më tej dorën gjakatare të diktaturës vendase që vulosi fate të dhimbshme.

“Historia u ndërtua me rrëfimet që ne morën në familjet e këtyre personazheve që trajtohen në dokumentar”, shprehet ajo.

Nga Bahri Tufina, sahatçiu “par excellence” që ndërtoi i pari një orë “made in Albania”,  tek Ibrahim Begeja, tregëtari i diplomuar në Paris që hapi dyqanin "OU Louvre" në rrugën Mbretnore. 14 personalitete që vunë gurëthemelet e një kryeqyteti dinjitoz, vijnë përmes rrëfimeve eksluzive të trashëgimtarëve.

“Në shkrimet e kohës thuhej se nëse futesh në dyqanin "OU Louvre" nuk jeni më në Tiranë, harrojeni, jeni në Paris, në Londë, jeni në të nesërmen”, vijon Admirina Peçi.

Pasardhësit shpalosin përndjekjet, burgosjet, pushkatimet e regjimit komunist edhe ndaj “etërve” të veprave të mëdha të kryeqytetit. Ndër ta, vetëm 3 të mbijetuar që arritën të përjetojnë rrëzimin e regjimit. Dokumentari mëkon jo vetëm plagët e familjarëve, por edhe të një historie që duhet treguar.

“Janë një varg personalitetesh që unë dua t’i veçoj pasi ato patën fund tragjik, u pushkatuan dhe një pjesë e tyre janë pa varr”, thotë gazetarja.

Dokumentari do të shfaqet këtë të premte në orën 17 në kinema “Millenium” dhe  është pjesë e ciklit “Dosja K” , ku Peçi zbardh prej vitesh historitë e atyre që vuajtën represionin komunist shqiptar.

K.T./SI.E./Shqiptarja.com

TAG:
• Tirane
• Admirina Peçi