14 raste të reja sot me COVID-19, prej një jave më shumë të shëruar se të infektuar pozitiv! Lajmi i mirë: Numri i të shtruarve i qëndrueshëm (VIDEO)

Prej më shumë se një jave në Shqipëri, numri i të shëruarve është më i lartë se ai i personave aktivë të infektuar me koronavirus. Aktualisht janë 314 të shëruar në total, dhe vetëm 222 raste aktivë, nga 562 që është numri në total i të gjithë të infektuarve në vendin tonë.

Gjatë 24 orëve të fundit janë identifikuar me COVID-19 14 raste të reja nga 231 persona të dyshuar që u testuan. Nga këto teste, 35 ishin personel mjekësor, ku vetëm një bluzë e bardhë në Shkodër doli pozitiv. Nga 14 rastet e reja, 7 janë në Krujë, 5 në Tiranë dhe 2 në Shkodër.

Deri më tani në Shqipëri janë kryer 5542 teste, nga të cilat vetëm 10% e të testuarve kanë dalë pozitiv, pra shifra 562 të prekur. Sipas Dr. Marjeta Dervishi nga Instituti i Shëndetit Publik, kjo shifër tregon "për një kontroll të mirë të epidemisë dhe për një numër krejtësisht të mjaftueshëm testimesh për të vlerësuar situatën".

Deri më tani, Shqipëria shënon 26 viktima të prekur me koronavirus. shumica prej të cilëve kanë pasur edhe sëmundje bashkëshoqëruese.

Në shërbimin infektiv aktualisht janë 34 të shtruar. 6 pacientë janë në terapi intensive.

Në spitalin COVID 2 “Shefqet Ndroqi”, janë 8 pacientë të shtruar. 4 pacientë janë në terapi intensive në gjendje të rënduar, ndërsa 4 prej tyre janë në pavion.

Në dy spitalet COVID aktualisht po marrin shërbim 42 pacientë.

"Pavarësisht luhatjeve në numrat ditorë të zbulimit të bartësve të virusit apo të sëmurëve prej tij, situata është njëlloj e kontrolluar.  Treguesi i vërtetë është numri i të shtruarve në spitale, që vazhdon të mbetet në shifra të qëndrueshme. Në mënyrë që situata të vazhdojë të jetë e kontrolluar, është e rëndësishme që qytetarët të respektojnë masat e distancimit fizik, si e vetmja mënyrë e kufizimit të përhapjes së infeksionit. Këto masa duhet të respektohen maksimalisht edhe brenda rretheve familjare, duke shmangur vizitat tek të afërmit për çdo lloj arsye. Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40", tha Dervishi.

Shpërndarja gjeografike e rasteve pozitive:

- Tiranë            251 raste
- Durrës            42 raste
- Lushnje          6 raste
- Elbasan          16 raste
- Fier                 36 raste
- Kavajë            9 raste
- Rrogozhinë     4 raste
- Korçë             19 raste
- Vlorë              5 raste
- Shkodër          96 raste
- Lezhë             14 raste
- Berat              2 raste
- Has                13 raste
- Krujë              18 raste
-Tropojë           4 raste
- Pukë               5 raste
- Mirditë           3 raste
- Kukës            11 rast
-Mallakastër     1 raste
- Kurbin             7 raste

Rendit zhvillimet sipas orarit:

Të Fundit Të Parat

G.M./b.ha./Shqiptarja.com

TAG:
• ministria e shendetesise
• koronavirusi ne shqiperi