2 vite mosrealizim në Dogana
dhe Tatime, 3 rishikime buxheti

TIRANE - Shkarkimi i Ministrit të Financave Shkëlqim Cani erdhi pas dy vitesh me mosrealizime të dukshme në tatime dhe dogana. Si në vitin 2014, ashtu dhe në 2015, Këshilli i Ministrave u detyrua të rishikojë buxhetet, duke ulur dukshëm planin e të ardhurave, njëherësh duke tkurrur edhe shpenzimet. Në vitin 2015 u regjistrua edhe rekordi i rishikimit të buxhetit për plot tre herë, ndërkohë që borxhi publik po në këtë vit shënoi shifrën rekord prej 72% 

Në dhjetor të vitit 2015, buxhetit të shtetit i munguan plot 20 miliardë lekë, afërisht 200 milionë dollarë. Megjithëse uli dukshëm pritshmëritë në mesin e vitit 2015, të ardhurat buxhetore në dhjetor rezultuan 5% më të ulëta se plani. Nga Tatimi mbi Vlerën e Shtuar janë mbledhur në dhjetor 5.6% të ardhura më pak se plani, ose minus 5.6 miliardë lekë. Ndërkohë që ka qenë akciza taksa me performancën negative, me një mosrealizim prej 13% krahasuar me planin, ose 5.8 miliardë lekë më pak se parashikimet e gjysmës së vitit.

Me mosrealizim rezultoi edhe viti 2014, pavarësisht rritjes së disa taksave të ndërmarra nga Qeveria socialiste menjëherë pas marrjes së pushtetit. Të ardhurat e buxhetit të konsoliduar për periudhën 12­mujore arritën në 366.7 miliardë lekë, 0.3 për qind më pak se parashikimi për 12 mujorin. Të ardhurat tatimore për periudhën 12 mujore arritën në 335.9 miliardë lekë, 0.3 për qind më pak se parashikimi për vitin 2014 sipas buxhetit vjetor të ndryshuar. Të ardhurat nga tatimet dhe doganat arritën në nivelin 253.4 miliardë lekë ose rreth 7 miliardë lekë më pak se parashikimi , ndërsa të ardhurat nga pushteti vendor arritën në 12.4 miliardë lekë, 2.6 për qind më pak se të ardhurat e planifikuara për këtë periudhë.

Redaksia Online
(Gre.M/Shqiptarja.com)