Miliona njerëz përgjatë Bregut Lindor të SHBA-ve po përballen me temperatura rekord ndërsa nis fundjava e festës së 4 Korrikut (Dita e Pavarësisë). Periudha më e nxehtë e vitit deri tani po i çon temperaturat në nivele që, në disa zona, nuk janë parë prej dekadash.

Vala e të nxehtit mund të ndikojë në aktivitetet e fundjavës, pasi presidenti amerikan Donald Trump do të organizojë një festë për 250-vjetorin e Amerikës, ndërsa disa ndeshje të Kupës së Botës do të zhvillohen në ambiente të hapura. Kjo vjen pas një periudhe të paprecedentë të vapës së hershme në Evropë, me temperatura rekord në të gjithë kontinentin. Temperaturat përvëluese dhe lagështia e lartë nuk janë të pazakonta në Amerikën e Veriut.

Megjithatë, shtrirja e gjerë e këtij fenomeni, që prek rreth 25 milionë njerëz në zonat qendrore dhe lindore dhe më pas gjithë lindjen gjatë fundjavës, e bën atë veçanërisht të rrezikshëm. Festa e 4 Korrikut shoqërohet me shumë aktivitete në natyrë, barbekju në oborre dhe tarraca, parada komunitare dhe fishekzjarre gjatë natës.

"Këto janë kushte jashtëzakonisht të rrezikshme," tha kryetari i bashkisë së Neë York-ut, Zohran Mamdani.

Ndërkohë, Filadelfia regjistroi temperaturën më të lartë që nga viti 2011, 39°C.

Trump pritet të mbajë një fjalim në ambient të hapur gjatë festimeve të 4 Korrikut të shtunën, pavarësisht temperaturave të larta të parashikuara. Presidenti ka këmbëngulur se dëshiron që ceremonia të zhvillohet jashtë. "Do të mbaj një fjalim shumë të gjatë vetëm për të treguar se mund të bëj gjithçka," tha ai.

Të shtunën mund të ketë lehtësim të vapës në disa zona qendrore, por jo në lindje, ku temperaturat do të mbeten të rrezikshme për ata që marrin pjesë në aktivitete në natyrë. Një tjetër shqetësim janë stuhitë e forta në rrafshinat veriore, rajonin e Midwest-it dhe zonën e Liqeneve të Mëdha. Ato pritet t'i japin fund të nxehtit me breshër të madh, erëra shkatërruese, përmbytje të menjëhershme dhe madje edhe disa tornado.

Deri të dielën, vapa do të intensifikohet në Virxhinia, Karolinën e Jugut dhe Veriut e juglindje, përpara se të përhapet drejt pjesëve perëndimore të SHBA-ve dhe Kanadasë gjatë javës së ardhshme.

Edhe Kanadaja, po përjeton temperatura ekstreme këtë javë, me temperaturat në Ontario që pritet të arrijnë në mesin e 30 gradëve Celsius.

Paralajmërime për vapë janë gjithashtu në fuqi në pjesën më të madhe të Kebekut, përfshirë Montrealin dhe qytetin e Kebekut.